ទីភ្នាក់ងារសារព័ត៌មាន Interfax-អ៊ុយក្រែនបានរាយការណ៍កាលពីថ្ងៃអង្គារ ដោយដកស្រង់សម្តីមន្ត្រីជាន់ខ្ពស់ម្នាក់ថា ទំនិញជាង ១៦២ លានតោន ត្រូវបានដឹកជញ្ជូនតាមរយៈច្រករបៀងសមុទ្រខ្មៅអ៊ុយក្រែនក្នុងរយៈពេលជាងពីរឆ្នាំនៃប្រតិបត្តិការរបស់ខ្លួន។

ឧបនាយករដ្ឋមន្ត្រីអ៊ុយក្រែនលោក Oleksii Kuleba បាននិយាយថា ចំនួននេះរួមមានគ្រាប់ធញ្ញជាតិចំនួន ៩៨ លានតោន ដោយបន្ថែមថា គ្រាប់ធញ្ញជាតិ និងប្រេងបន្លែរបស់ប្រទេស ត្រូវបានដឹកជញ្ជូនទៅកាន់ប្រទេសចំនួន ៥៥ តាមរយៈផ្លូវនេះ។

លោក Kuleba បានអះអាងថា នាវាជិត ៧.០០០ គ្រឿង បានប្រើប្រាស់ច្រករបៀងដឹកជញ្ជូន ចាប់តាំងពីច្រកនេះ ត្រូវបានបង្កើតឡើង ក្នុងខែសីហា ឆ្នាំ ២០២៣។

លោកបាននិយាយថា ទោះបីជាមានការគំរាមកំហែងផ្នែកយោធាជាបន្តបន្ទាប់ចំពោះច្រករបៀងនេះក៏ដោយ ក៏អ៊ុយក្រែនរក្សាការនាំចេញតាមសមុទ្រ ខណៈពេលដែលពង្រឹងសន្តិសុខនៃកំពង់ផែ។

លោក Kuleba បានបន្ថែមថា ប្រភពថាមពលបម្រុង កំពុងត្រូវបានដាក់ពង្រាយ អង្គភាពផលិតថាមពលរួមគ្នា កំពុងត្រូវបានដំឡើង និងហេដ្ឋារចនាសម្ព័ន្ធសំខាន់ៗ កំពុងត្រូវបានធ្វើទំនើបកម្ម។ កំពង់ផែកំពុងសម្របខ្លួន ដើម្បីដំណើរការក្រោមលក្ខខណ្ឌនៃការរឹតបន្តឹងថាមពល និងការវាយប្រហារចម្រុះ»៕