នារសៀលថ្ងៃទី១៧ ខែធ្នូ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពីធី ប្រគល់-ទទួលសៀវភៅសិក្សាគោលដែលបានដាក់បញ្ចូលការអប់រំបទប្បញ្ញត្តិគ្រឹះនៃរដ្ឋធម្មនុញ្ញ ទៅក្នុងកម្មវិធី និងសៀវភៅសិក្សា មុខវិជ្ជាសិក្សាសង្គមគ្រប់កម្រិតថ្នាក់ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និង អគ្គលេខាធិការដ្ឋានក្រុមប្រឹក្សាធម្មនុញ្ញ និងមន្ត្រីពាក់ព័ន្ធក្រោមឱវាទក្រសួងអប់រំ យុវជន និងកីឡា។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានរម្លឹកឡើងវិញពីសាវតារនៃការរៀបចំបញ្ចូល ការអប់រំបទប្បញ្ញត្តិគ្រឹះនៃរដ្ឋធម្មនុញ្ញ ទៅក្នុងកម្មវិធី និងសៀវភៅសិក្សាមុខវិជ្ជាសិក្សាសង្គមគ្រប់កម្រិតថ្នាក់ ដោយគូសបញ្ជាក់ថា ការបញ្ចូលបទប្បញ្ញត្តិគ្រឹះមួយចំនួន ដែលមានចែងនៅក្នុងរដ្ឋធម្មនុញ្ញ នៃព្រះរាជាណាចក្រកម្ពុជា ទៅក្នុងកម្មវិធីសិក្សា គឺជាយន្តការមួយដ៏មានប្រសិទ្ធភាព និងវិសាលភាពទូលំទូលាយ ក្នុងការកសាងធនធានមនុស្សប្រកបដោយគុណភាព។

យោងតាមរបាយការណ៍ ស្តីពី ការបញ្ចូលបទប្បញ្ញត្តិគ្រឹះ នៃរដ្ឋធម្មនុញ្ញ ទៅក្នុងកម្មវិធីសិក្សា និងសៀវភៅសិក្សាគោល បានឱ្យដឹងថា ខ្លឹមសារដែលបានបញ្ចូលមានគោលបំណងឱ្យសិស្សយល់ដឹងថា៖ ១) រដ្ឋធម្មនុញ្ញ គឺជាច្បាប់កំពូល នៃព្រះរាជាណាចក្រកម្ពុជា ដែលបុគ្គលគ្រប់រូបត្រូវគោរព ២) ពង្រឹងនិងពង្រីកការយល់ដឹងអំពីគោលការណ៍ធំៗ ដែលមានចែងនៅក្នុងរដ្ឋធម្មនុញ្ញ នៃព្រះរាជាណា-ចក្រកម្ពុជា គឺជាមូលដ្ឋានគ្រឹះចាំបាច់ និងមានសារៈសំខាន់ក្នុងការកសាងចំណេះដឹងទូទៅ សម្រាប់ប្រជាពលរដ្ឋខ្មែរគ្រប់រូប ក្នុងការពង្រឹងមនសិការស្នេហាជាតិ និងសីលធម៌សង្គម។ 

នាឱកាសនេះ ឯកឧត្តមបណ្ឌិត អគ្គលេខាធិការរង និងជាប្រធានក្រុមការងារ តំណាងក្រុមប្រឹក្សាធម្មនុញ្ញ បានលើកឡើងថា សៀវភៅសិក្សាគោល មុខវិជ្ជា វិទ្យាសាស្ត្រ-សិក្សាសង្គម និងសីលធម៌-ពលរដ្ឋវិជ្ជា ដែលមានបញ្ចូលបទប្បញ្ញត្តិគ្រឹះនៃរដ្ឋធម្មនុញ្ញ ពីថ្នាក់ទី១ដល់ថ្នាក់ទី១២ គឺជាសមិទ្ធផលរួមគ្នាគួរជាទីសាទរ កើតចេញពីការអនុវត្តព្រមព្រៀងរវាងក្រុមប្រឹក្សាធម្មនុញ្ញនៃព្រះរាជាណាចក្រកម្ពុជា និងក្រសួងអប់រំ យុវជន និងកីឡា អស់រយៈពេលជាង ៤ឆ្នាំកន្លងមកនេះ។ នេះជាគំនិតផ្តួចផ្តើមដំបូងបំផុត របស់ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម អតីតប្រធានក្រុមប្រឹក្សាធម្មនុញ្ញ បានបន្តដឹកនាំអនុវត្តដោយឯកឧត្តម ហ៊ី សោភា ប្រធានក្រុមប្រឹក្សាធម្មនុញ្ញ ក្នុងអាណត្តិបច្ចុប្បន្ន និងមានការចូលរួមយ៉ាងសកម្មពី ក្រសួងអប់រំ យុវជន និងកីឡា ដែលមានឯកឧត្តមបណ្ឌិតសភាចារ្យ ហង់ជួន ណារ៉ុន ជាមគ្គទេសក៍ដឹកនាំផ្ទាល់ រហូតសម្រេចបាននូវការបញ្ចូលបទប្បញ្ញត្តិគ្រឹះនៃរដ្ឋធម្មនុញ្ញទៅក្នុងកម្មវិធីសិក្សាទាំងបីកម្រិតដោយជោគជ័យ។

បន្ទាប់ពីស្តាប់របាយការណ៍ និងចំណាប់អារម្មណ៍របស់ ឯកឧត្តមបណ្ឌិត អគ្គលេខាធិការរង ជាប្រធានក្រុមការងារ តំណាងក្រុមប្រឹក្សាធម្មនុញ្ញ រួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានអបអរសាទរ និងកោតសរសើរដោយស្មោះចំពោះកិច្ចសហការដ៏ល្អរវាងក្រុមការងារ អគ្គលេខាធិការដ្ឋាននៃក្រុមប្រឹក្សាធម្មនុញ្ញ និងក្រុមការងារក្រសួងអប់រំ យុវជន និងកីឡា ជាពិសេសនាយកដ្ឋានអភិឌ្ឍកម្មវិធីសិក្សា ដែលបានរៀបចំ «ខ្លឹមសារនៃបទប្បញ្ញត្តិគ្រឹះនៃរដ្ឋធម្មនុញ្ញនៃព្រះរាជាណាចក្រកម្ពុជា» ដើម្បីដាក់បញ្ចូលទៅក្នុងកម្មវិធីសិក្សានិងសៀវភៅសិក្សាទាំងបីកម្រិត (បឋមសិក្សា មធ្យមសិក្សាបឋមភូមិ និងទុតិយភូមិ) ព្រមទាំងរៀបចំបានជា សៀវភៅជំនួយស្មារតីគ្រូ ក្នុងគោលបំណងលើកកម្ពស់ការយល់ដឹងរបស់សិស្សនៅគ្រប់កម្រិត អំពីសិទ្ធិនិងភារកិច្ច ដែលបានកំណត់ច្បាស់នៅក្នុងច្បាប់រដ្ឋធម្មនុញ្ញ ដែលជាច្បាប់កំពូលនៃព្រះរាជាណាចក្រកម្ពុជា។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សូមគាំទ្រពេញទំហឹងចំពោះកិច្ចការនេះ និងបន្តផ្សព្វផ្សាយ លើកកម្ពស់ការយល់ដឹងរបស់សិស្សអំពី ខ្លឹមសារនៃបទប្បញ្ញត្តិគ្រឹះនៃរដ្ឋធម្មនុញ្ញនៃព្រះរាជាណាចក្រកម្ពុជា ក៏ដូចជាដល់លោកគ្រូ អ្នកគ្រូ និងគ្រូឧទ្ទេសនៅសាលាគរុកោសល្យ ដោយជឿជាក់ថា ការដាក់បញ្ចូលបទប្បញ្ញត្តិគ្រឹះនៃរដ្ឋធម្មនុញ្ញនឹងជំរុញឱ្យបុគ្គលិកអប់រំ លោកគ្រូ អ្នកគ្រូ និងគ្រូឧទ្ទេស សិក្សាស្វែងយល់ និងក្រេបយកចំណេះដឹងថ្មីៗ បានស៊ីជម្រៅលើខ្លឹមសារនៃការអប់រំបទប្បញ្ញត្តិគ្រឹះនៃរដ្ឋធម្មនុញ្ញ ដើម្បីទទួលយកពុទ្ធិផ្នែកច្បាប់ ទៅបណ្តុះបណ្តាលបន្តដល់គ្រូបង្រៀន និងសិស្សានុសិស្សនៅតាមសាលារៀនទូទាំងប្រទេស ឱ្យកាន់តែទូលំទូលាយ និងបានស្នើឱ្យរៀបចំវគ្គបណ្ដុះបណ្តាល តម្រង់ទិស ដើម្បីរំលេចពីគោលការណ៍ បទប្បញ្ញត្តិសំខាន់ៗ ផ្សារភ្ជាប់នឹងវិធីសាស្ត្របង្រៀន ដើម្បីធានាថាសៀវភៅគោលទាំងនេះនឹងត្រូវបានប្រើប្រាស់បានត្រឹមត្រូវ ប្រកបដោយប្រសិទ្ធភាព និងប្រសិទ្ធផល៕