ភ្នំពេញ៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា បច្ចុប្បន្នការអភិវឌ្ឍសហគ្រាសធុនតូច និងមធ្យម (SME) បានក្លាយជាជន្ទល់ និងប្រភពកំណើនសេដ្ឋកិច្ចរយៈពេលវែង និងការបង្កើតការងារ។ ក្នុងនោះ សម្រាប់ស្រ្តីមានប្រមាណ ៦១% ដែលជាម្ចាស់អាជីវកម្ម និងអ្នកធ្វើជំនួញ ដែលជាអត្រាខ្ពស់មួយសម្រាប់កម្ពុជា។

នៅក្នុងពិធីសំណេះសំណាលជាមួយមន្ត្រីរាជការជានារីរបស់ក្រសួងការងារ និងបណ្តុះបណ្តាលវិជ្ជាជីវៈ ដើម្បីចូលរួមអបអរសាទរខួបលើកទី១១១ នៃទិវាអន្តរជាតិនារី ៨មីនា ឆ្នាំ២០២២ ក្រោមប្រធានបទ “សមភាពយេនឌ័រថ្ងៃនេះ ដើម្បីចីរភាពនាពេលអនាគត” កាលពីព្រឹក​ថ្ងៃទី២៨ ខែកុម្ភៈនេះ ឯកឧត្តមរដ្ឋមន្រ្តី បានមានប្រសាសន៍ថា តាមការសិក្សា​ស្រាវជ្រាវ​នានា​បាន​បង្ហាញថា ​ការរីករាលដាលនៃជម្ងឺកូវីដ-១៩ បានបង្កផលប៉ះពាល់ អវិជ្ជមានលើស្រ្តីច្រើនជាងបុរស ទាំងក្នុងវិស័យសេដ្ឋកិច្ច និងសង្គម ជាពិសេសស្រ្តីនៅក្នុងប្រទេសកំពុងអភិវឌ្ឍន៍ ដែលកំពុងរង​ផល​ប៉ះពាល់យ៉ាងធ្ងន់ធ្ងរ ​ដោយសារស្រ្តីភាគច្រើនមានការងារនៅក្នុងវិស័យសេវាកម្ម និង​វិស័យ​សេដ្ឋកិច្ច​ក្រៅប្រព័ន្ធ។

ឯកឧត្តម បានបន្ត ក្នុងបរិការនេះ រដ្ឋាភិបាលកម្ពុជា​បានដាក់ចេញនូវវិធានការនានា​ដែល​បាន​ឆ្លើយ​តប ​និងផ្តល់នូវអត្ថប្រយោជន៍ ​ដោយផ្ទាល់ដល់ស្រ្តី និងក្រុមជនងាយរងគ្រោះ ពិសេស​តាម​រយៈគោល​នយោបាយគាំពារសង្គម ​ការដាក់ចេញវិធានការអន្តរាគមន៍ជំនួយ​សង្គម ការ​បង្កើន​មូលធន ថវិកា “សាច់ប្រាក់ពលកម្ម” ដើម្បីជួយកម្មករនិយោជិត​ដែលបានព្យួរការងារ កម្មវិធីជំនួយ​សង្គម ពិសេសជួយស្តារលទ្ធភាព និងលើកកម្ពស់អាជីវកម្មសហគ្រាសធុនតូច ​និងមធ្យម​ជាដើម។

សូមបញ្ជាក់ថា ​យុទ្ធនាការទិវាអន្តរជាតិនារី ៨មីនា​ គឺជាព្រឹត្តការណ៍ជាសកល ដែលមហា​សន្និបាត​អង្គការ​សហប្រជាជាតិ បានប្រកាសជាទិវារបស់អង្គការសហប្រជាជាតិស្តីពីសិទ្ធិស្រ្តី​និង​សន្តិភាព​ពិភពលោក​នាឆ្នាំ១៩៧៧។​

ជារៀងរាល់ឆ្នាំ កម្ពុជាបានរៀបចំទិវានេះ ដើម្បីរំលឹកពីការតស៊ូទាមទារសិទ្ធិ សេរីភាព និង​ឆ្លុះបញ្ចាំង​អំពីវឌ្ឍនភាព សមិទ្ធផល​ បញ្ហាប្រឈម ​ការប្តេជ្ញាចិត្ត និងវិធានការជាវិជ្ជមាននានាក្នុងការ​លើក​កម្ពស់សមភាពយេនឌ័រ ​និងបង្កើនភាពអង់អាចដល់ស្រ្តី ​និងក្មេងស្រីគ្រប់រូប។ ដោយឡែកសម្រាប់ឆ្នាំនេះ ​ពិធីអបអរសាទរទិវាអន្តរជាតិនារី ​៨ មីនា គឺប្រារព្ធឡើងក្នុងគោលបំណង​បញ្ជាក់អំពីតម្លៃនៃការទទួលបាននូវសមភាពរវាងស្រ្តី ​និងបុរស​សម្រាប់ការអភិវឌ្ឍ​គ្រប់វិស័យ និង​ជម្រុញឲ្យគ្រប់ដៃគូពាក់ព័ន្ធបន្តអនុវត្តវិធានការផ្នែកគោលនយោបាយ ​កម្មវិធី និង​សកម្មភាព​ជាក់​លាក់នានា ​ក្នុងការលើកកម្ពស់សមភាពយេនឌ័រ ​និងបង្កើនភាពអង់អាចដល់ស្រ្តី នៅ​ក្នុង​របៀប​វារៈស្តារសេដ្ឋកិច្ច ​សង្គមក្រោយវិបត្តិកូវីដ-១៩ ​និងការរស់នៅតាមបែបគន្លងប្រក្រតីភាពថ្មី ក៏ដូចជា​ការកសាងភាពរឹងមាំ​ និងការអភិវឌ្ឍប្រកបដោយចីរភាព៕អត្ថបទ៖ ឈិត បូរ៉ាវី