បណ្ដាថ្នាក់ដឹកនាំសហភាពអឺរ៉ុប កំពុងជួបជុំគ្នានៅទីក្រុងព្រុចសែល ក្នុងថ្ងៃព្រហស្បតិ៍ (១៨ ធ្នូ) នេះ ដើម្បីបើកកិច្ចប្រជុំកំពូលមួយ ដែលមានគោលបំណងស្វែងរកការឯកភាព លើប្រាក់កម្ចីដ៏ច្រើនសន្ធឹកសន្ធាប់ ដើម្បីរ៉ាប់រងលើតម្រូវការយោធា និងហិរញ្ញវត្ថុផ្សេងទៀតរបស់ប្រទេសអ៊ុយក្រែន សម្រាប់រយៈពេល ២ឆ្នាំខាងមុខ។

ក្នុងជំនួបនេះ មេដឹកនាំប្លុកអឺរ៉ុបក៏នឹងពិភាក្សាបញ្ហាអន្តោប្រវេសន៍ គោលនយោបាយពង្រីកប្លុក ពាណិជ្ជកម្ម និងសេដ្ឋកិច្ច ប៉ុន្តែប្រធានបទសំខាន់គឺការស្វះស្វែងរកមធ្យោបាយផ្តល់មូលនិធិភាគច្រើននៃទឹកប្រាក់ចំនួន ១៣៧ពាន់លានអឺរ៉ូ (១៦០ ពាន់លានដុល្លារ) ដល់អ៊ុយក្រែន។ មូលនិធិរូបិយវត្ថុអន្តរជាតិ IMF និយាយថា តម្រូវការអ៊ុយក្រែន ដែលរងការបំផ្លិចបំផ្លាញដោយសង្គ្រាម គឺជាអាទិភាពចម្បង។

ប្រធានក្រុមប្រឹក្សាអឺរ៉ុប លោក António Costa ដែលធ្វើជាប្រធានកិច្ចប្រជុំនៅថ្ងៃព្រហស្បតិ៍នេះ បានសន្យារួចមកហើយថា នឹងទុកឱ្យមេដឹកនាំបន្តជជែកចរចា រហូតដល់កិច្ចព្រមព្រៀងមួយត្រូវបានសម្រេច ទោះបីជាត្រូវចំណាយពេលច្រើនថ្ងៃក៏ដោយ។

មេដឹកនាំជាច្រើននឹងជំរុញឱ្យប្រើទ្រព្យសម្បត្តិរុស្ស៊ី តម្លៃរាប់សិបពាន់លានអឺរ៉ូ ដែលត្រូវបង្កកនៅអឺរ៉ុប ដើម្បីបំពេញតម្រូវការសេដ្ឋកិច្ច និងយោធារបស់អ៊ុយក្រែន។ ធនាគារកណ្តាលអឺរ៉ុប ECB បានព្រមានថា ប្រសិនបើអឺរ៉ុបបង្ហាញឆន្ទៈក្នុងការដណ្តើមយកប្រាក់របស់ប្រទេសដទៃ នោះអាចធ្វើឱ្យប៉ះពាល់ដល់ទំនុកចិត្តលើប្រាក់អឺរ៉ូ។ ប្រទេសជាសមាជិកមួយចំនួនក៏មានក្ដីបារម្ភផងដែរអំពីការសងសឹករបស់រុស្ស៊ី លើអ្វីដែលទីក្រុងមូស្គូ រិះគន់ថា "ជាការលួចទ្រព្យសម្បត្តិអ្នកដទៃ"៕