​ប្រដាល់៖ អតីត​កីឡាករ​ប្រដាល់​ជើងឯក​ទម្ងន់​ធ្ងន់​ពិភពលោក Wladimir Klitschko បាន​និយាយថា "​ខ្ញុំ​ជា​ជនជាតិ​អ៊ុយ​ក្រែ​ន ហើយ​ខ្ញុំ​ជា​អ្នក​ប្រយុទ្ធ​" នៅពេល​ត្រូវបាន​សួរ​អំពី​ថា​ តើ​គាត់​នឹងចូលរួម​ក្នុង​ការតស៊ូ​ប្រឆាំងនឹង​ការឈ្លានពាន​របស់​យោធា​រុស្ស៊ី​ លើ​ប្រទេស​របស់គាត់​ដែរឬទេ​។​

​នៅក្នុង​បទសម្ភាសន៍​ដែល​ធ្វើឡើង​នៅ​សាលាក្រុង Kyiv, Wladimir Klitschko បាន​បង្ហើប​ថា លោក​បាន​ត្រៀមខ្លួន​រួចជាស្រេច​ដើម្បី​ប្រយុទ្ធ​សម្រាប់​អ៊ុយ​ក្រែ​ន​ប្រសិនបើ​ចាំបាច់​។​ ​ចំពេល​មាន​ភាព​តានតឹង​កើនឡើង អ៊ុយ​ក្រែ​ន​បានប្រកាស​ថា​នឹងមាន​ការចរចា​មួយ​ជាមួយ​រុស្ស៊ី​។​ Klitschko ក៏បាន​ពណ៌នា​អំពី​បទពិសោធន៍ "​ចំលែក​" នៃ​ការ​រស់នៅក្នុង​ទីក្រុង​របស់គាត់ នៅពេលដែល​គ្រាប់បែក​បាន​ធ្លាក់ចុះ​ដូច​ទឹកភ្លៀង តាមរយៈ​សង្គ្រាម​ ៥​ថ្ងៃ​ចាប់តាំងពី​រុស្ស៊ី​របស់ ​ពូ​ទីន ​បាន​ឈ្លានពាន​អ៊ុយ​ក្រែ​ន​កាលពី​ថ្ងៃ​ព្រហស្បតិ៍​។

​បច្ចុប្បន្ន​វ័យ ៤៥ឆ្នាំ Wladimir Klitschko ធ្លាប់​គ្រប់គ្រង​ខ្សែក្រវាត់​ប្រដាល់​ពិភពលោក​ក្របខណ្ឌ WBA, IBF, WBO និង IBO​។​ ​នៅ​ឆ្នាំ២០១៧ Klitschko បានប្រកាស​ពី​ការចូលនិវត្តន៍​ពី​អាជីព​របស់ខ្លួន​ ជាមួយនឹង​ស្ថិតិ​ប្រកួត ៦៩លើក ​ឈ្នះ ៦៤ ផ្តួល​គូប្រកួត​នៅលើ​សង្វៀន ៥៣លើក​។ Wladimir Klitschko គឺ​ប្អូនប្រុស​បង្កើត​របស់ Vitali Klitschko ដែលជា​អតីត​កីឡាករ​ប្រដាល់ និង​បច្ចុប្បន្ន​ជា​អភិបាលក្រុង Kyiv៕

​អត្ថបទ​៖​នាង សុភា​វុ​ធ