ក្រសួងការពារជាតិវ៉េណេស៊ុយអេឡាបាននិយាយនៅក្នុងសេចក្តីថ្លែងការណ៍មួយថា កងកម្លាំងប្រដាប់អាវុធរបស់ប្រទេសនេះ បដិសេធការចោទប្រកាន់ និងការគំរាមកំហែងរបស់សហរដ្ឋអាមេរិក ហើយនឹងការពារឯករាជ្យភាព និងបូរណភាពទឹកដីរបស់ខ្លួន។ 

ក្រសួងបានលើកឡើងថា៖«កងកម្លាំងប្រដាប់អាវុធជាតិវ៉េណេស៊ុយអេឡាបដិសេធយ៉ាងដាច់អហង្ការចំពោះសេចក្តីថ្លែងការណ៍បំភាន់របស់ប្រធានាធិបតីអាមេរិក ដូណាល់ ត្រាំ ដែលធ្វើឡើងនៅថ្ងៃទី ១៦ ខែធ្នូ ដែលថាលោកបានគំរាមកំហែងប្រទេសរបស់យើងយ៉ាងច្បាស់ ជាមួយនឹងសកម្មភាពយោធា និងបានបញ្ជាឲ្យបិទផ្លូវកងទ័ពជើងទឹកទាំងស្រុង ដោយមានគោលបំណងរឹបអូសនាវាដែលដឹកជញ្ជូនប្រេងរបស់វ៉េណេស៊ុយអេឡា ដែលជាទង្វើចោរសមុទ្រដ៏អាក្រក់»។

ក្រសួងបានបញ្ជាក់ថា ការកើនឡើងនៃការគំរាមកំហែងពីការប្រើប្រាស់កម្លាំងប្រឆាំងនឹងវ៉េណេស៊ុយអេឡា គឺមានគោលបំណង «ផ្លាស់ប្តូររបប រឹបអូសប្រេង និងធនធានយុទ្ធសាស្ត្រផ្សេងទៀតរបស់សាធារណរដ្ឋនេះ» ដោយបន្ថែមថា សហរដ្ឋអាមេរិកកំពុងស្វែងរកការរស់ឡើងវិញនូវគោលការណ៍ Monroe និង       «បង្កើតការត្រួតត្រាអាណានិគមនិយមថ្មីរបស់ខ្លួន នៅអឌ្ឍគោលខាងលិច»។

ក្រសួងបានសង្កត់ធ្ងន់ថា ប្រជាជន កងទ័ព និងនគរបាលវ៉ណេស៊ុយអេឡា នឹងការពារ «ប្រព័ន្ធរដ្ឋធម្មនុញ្ញ និងប្រជាធិបតេយ្យរបស់សាធារណរដ្ឋ បូរណភាពទឹកដីរបស់ប្រទេសនេះ សិទ្ធិស្របច្បាប់របស់ខ្លួនចំពោះលំហអាកាស និងសមុទ្ររបស់ខ្លួន ហើយនឹងការពារសេរីភាព អធិបតេយ្យភាព ឯករាជ្យភាព និងសន្តិភាព»។

នាពេលថ្មីៗនេះ ប្រធានាធិបតីអាមេរិក ដូណាល់ ត្រាំ បានសរសេរនៅលើវេទិកានៃប្រព័ន្ធផ្សព្វផ្សាយសង្គម Truth Social របស់លោកថា ប្រទេសវ៉េណេស៊ុយអេឡា «ត្រូវបានហ៊ុមព័ទ្ធទាំងស្រុងដោយកងនាវា Armada ដ៏ធំបំផុត ដែលមិនធ្លាប់មានក្នុងប្រវត្តិសាស្ត្រអាមេរិកខាងត្បូង» ដោយបន្ថែមថា វានឹង «កាន់តែធំឡើង» និង «មិនដូចអ្វីដែលពួកគេធ្លាប់ឃើញពីមុនមក» រហូតដល់ទីក្រុងការ៉ាកាសប្រគល់ទៅឲ្យទីក្រុងវ៉ាស៊ីនតោនវិញនូវប្រេងដែលបានលួចនិងទ្រព្យសម្បត្តិផ្សេងទៀត»៕