ប្រធានាធិបតីអាមេរិក លោក Donald Trump កាលពីថ្ងៃពុធ (ទី១៧ ខែធ្នូ) បានទាមទារវ៉េណេស៊ុយអេឡាត្រូវប្រគល់ទ្រព្យសម្បត្តិ ដែលលោកបានចោទប្រកាន់ថា ប្រទេសសម្បូរដោយធនធានប្រេងនៅតំបន់អាមេរិកខាងត្បូងមួយនេះ បានយកពីក្រុមហ៊ុនប្រេងរបស់សហរដ្ឋអាមេរិក កាលពីច្រើនឆ្នាំកន្លងទៅ។

ដោយបានសំដៅទៅលើការធ្វើជាតូបនីយកម្ម (ការផ្ទេររបស់ឯកជនឲ្យទៅជារបស់ជាតិ) របស់វ៉េណេស៊ុយអេឡាលើវិស័យប្រេងរបស់ខ្លួន ក្នុងទសវត្សរ៍ឆ្នាំ១៩៧០ និងក្រោមការដឹកនាំរបស់លោកប្រធានាធិបតី Nicolas Maduro និងអ្នកស្នងតំណែងមុនរបស់លោក គឺលោក Hugo Chavez លោក Trump បានប្រាប់សារព័ត៌មាននៅសេតវិមានថា៖ «ពួកគេបានយកទ្រព្យសម្បត្តិប្រេងរបស់យើង ពោលគឺយើងមានប្រេងច្រើននៅទីនោះ។ ដូចអ្នកដឹងហើយថា ពួកគេបានបង្ខំឲ្យក្រុមហ៊ុនរបស់ពួកយើងចាកចេញ ហើយយើងចង់បានធនធាននោះមកវិញ»។

តាមរយៈការបង្ហោះនៅលើបណ្ដាញសង្គម លោក Stephen Miller អនុប្រធានបុគ្គលិករបស់លោក Trump កាលពីថ្ងៃពុធ បានពណ៌នាអំពីការធ្វើជាតូបនីយកម្មរបស់វ៉េណេស៊ុយអេឡា លើឧស្សាហកម្មប្រេងរបស់ខ្លួនថា ជា «ការលួចធនធាន និងទ្រព្យសម្បត្តិអាមេរិកដ៏ច្រើនបំផុត»។

នៅមួយថ្ងៃមុននោះ លោក Trump បានបញ្ជាឲ្យ «បិទទាំងស្រុង និងជារួមនូវនាវាដឹកប្រេងដែលត្រូវបានដាក់ទណ្ឌកម្មទាំងអស់ ដែលទាំងចេញ និងចូល នៅក្នុងប្រទេសវ៉េណេស៊ុយអេឡា» ដោយបង្កើនយុទ្ធនាការដាក់សម្ពាធរយៈពេលជាច្រើនខែលើប្រធានាធិបតីវ៉េណេស៊ុយអេឡា។

វ៉េណេស៊ុយអេឡា ដែលជាប្រទេសផលិតប្រេងដ៏សំខាន់មួយ តាមការអះអាង ក្ដោបក្ដាប់ធនធានប្រេងបម្រុងដ៏ធំបំផុតរបស់ពិភពលោក តែការនាំចូលប្រេងឆៅរបស់សហរដ្ឋអាមេរិក បានធ្លាក់ចុះយ៉ាងខ្លាំង ក្នុងរយៈពេលមួយទសវត្សរ៍កន្លងមកនេះ ដោយសារទណ្ឌកម្ម និងភាពតានតឹងផ្នែកនយោបាយ៕