រដ្ឋមន្ត្រីការបរទេសអ៊ីស្រាអែល លោក Gideon Saar កាលពីថ្ងៃពុធ (ទី១៧ ខែធ្នូ) បានចោទប្រកាន់អ៊ីរ៉ង់ថា កំពុងប្រឹងប្រែងអភិវឌ្ឍអាវុធនុយក្លេអ៊ែរ ដោយបានចាត់ទុកទីក្រុងតេអេរ៉ង់ថា ជាការគំរាមកំហែងដល់ស្ថិរភាពក្នុងតំបន់។

នៅក្នុងបទសម្ភាសន៍ផ្តាច់មុខជាមួយប្រព័ន្ធផ្សព្វផ្សាយ Al Arabiya លោក Saar បាននិយាយថា អ៊ីរ៉ង់ «មិនត្រឹមតែជាបញ្ហារបស់អ៊ីស្រាអែលប៉ុណ្ណោះទេ» ដោយបានកត់សម្គាល់ពីការចូលរួមរបស់សហរដ្ឋអាមេរិក ជាមួយអ៊ីស្រាអែល នៅក្នុងការវាយប្រហារលើទីតាំងនុយក្លេអ៊ែរអ៊ីរ៉ង់ អំឡុងសង្រ្គាមរយៈពេល ១២ថ្ងៃ កាលពីខែមិថុនា។

កាលពីថ្ងៃអង្គារ ប្រធានទីភ្នាក់ស៊ើបការណ៍សម្ងាត់ Mossad របស់អ៊ីស្រាអែល បានលើកឡើងថា ប្រទេសត្រូវតែ «ធានាឲ្យបាន» ថា អ៊ីរ៉ង់មិនចាប់ផ្តើមកម្មវិធីនុយក្លេអ៊ែររបស់ខ្លួនឡើងវិញទៀតទេ។

មហាអំណាចលោកខាងលិច បានចោទប្រកាន់អ៊ីរ៉ង់ជាយូរមកហើយថា បានប្រឹងប្រែងផលិតអាវុធនុយក្លេអ៊ែរ ហើយបានព្យាយាមរារាំងមិនឲ្យដំណើរការផលិតសម្រេចបាន ខណៈដែលទីក្រុងតេអេរ៉ង់តែងតែបដិសេធការចោទប្រកាន់នេះ។

សម្រាប់លោក Saar ជាមួយគ្នានេះ លោកក៏បានលើកឡើងពីស្ថានភាព នៅក្នុងប្រទេសលីបង់ ដោយបញ្ជាក់ថា ការវាយប្រហាររបស់អ៊ីស្រាអែល ប្រឆាំងនឹងក្រុមហេសបូឡា មិនបំពានលើអធិបតេយ្យភាពលីបង់ឡើយ។ ផ្ទុយទៅវិញ លោកបានបញ្ជាក់ថា ក្រុមដែលគាំទ្រដោយអ៊ីរ៉ង់ គឺជាក្រុមបំផ្លាញអធិបតេយ្យភាពរបស់ប្រទេសនេះ។

លោកបានសង្គត់ធ្ងន់ថា អ៊ីស្រាអែលមានជម្លោះ «តូចតាច» ប៉ុណ្ណោះ ជាមួយលីបង់ ដែលអាចដោះស្រាយបានយ៉ាងងាយស្រួល ដោយបន្ថែមថា បញ្ហាពិតប្រាកដ គឺផ្តើមចេញពីក្រុមហេសបូឡា និងអ៊ីរ៉ង់៕