សមាជិកសភាគណបក្សប្រឆាំង បានប៉ះទង្គិចជាមួយនគរបាលនៅខាងក្នុងសភាអាល់បានី នាថ្ងៃព្រហស្បតិ៍ (ទី១៨ ខែធ្នូ) បន្ទាប់ពីភាពតានតឹងជាច្រើនសប្តាហ៍ ជុំវិញការចោទប្រកាន់អំពីការប្រព្រឹត្តិអំពើពុករលួយ ប្រឆាំងនឹងលោកឧបនាយករដ្ឋមន្ត្រី Edi Rama និងមន្ត្រីដទៃទៀត។

សមាជិកសភា បានដុតភ្លើង ជះទឹកទៅលើប្រធានសភា និងកាន់កាប់កៅអីដែលទុកសម្រាប់រដ្ឋមន្ត្រីរដ្ឋាភិបាល ក្នុងគោលបំណងរំខានដល់សម័យប្រជុំ មុនពេលនគរបាលធ្វើអន្តរាគមន៍។

លោក Sali Berisha មេដឹកនាំគណបក្សប្រឆាំង គឺប្រជាធិបតេយ្យ (PD) បាននិយាយថា «មិនអាចមានសភា ដែលមានអ្នកលួច ហើយគេចខ្លួននោះទេ។ ច្បាប់ គឺច្បាប់ដែលត្រូវតែគោរព»។ សមាជិកសភាបក្សប្រឆាំង កំពុងទាមទារឲ្យមានការចោទប្រកាន់ជាផ្លូវការ ដែលដាក់លើឧបនាយករដ្ឋមន្ត្រី លោកស្រី Belinda Balluku។

ការិយាល័យអយ្យការពិសេស ដែលមានភារកិច្ចប្រយុទ្ធប្រឆាំងនឹងអំពើពុករលួយ និងបទល្មើសព្រហ្មទណ្ឌ បានស្នើសភាអនុញ្ញាតឲ្យមានការចាប់ខ្លួនលោកស្រី Balluku ហើយសភាដែលគណបក្សកាន់អំណាចរបស់លោក Rama មានសំឡេងភាគច្រើន ត្រូវបានគេរំពឹងថា នឹងបោះឆ្នោតលើសំណើនេះ នៅថ្ងៃសុក្រ។

លោកស្រី Balluku ដែលធ្លាប់ធ្វើជារដ្ឋមន្ត្រីក្រសួងហេដ្ឋារចនាសម្ព័ន្ធ និងថាមពល និងជាសម្ព័ន្ធមិត្តគណៈរដ្ឋមន្ត្រីដ៏ជិតស្និទ្ធបំផុតរបស់លោក Rama ត្រូវបានចោទប្រកាន់ថា បានចូលរួមក្នុងការប្រព្រឹត្តិអំពើពុករលួយដែលមានបំណងអនុគ្រោះដល់ក្រុមហ៊ុនដែលទទួលខុសត្រូវ ចំពោះគម្រោងហេដ្ឋារចនាសម្ព័ន្ធសំខាន់ៗ រួមទាំងផ្លូវរូងក្រោមដី និងផ្លូវក្រវ៉ាត់ក្រុង ក្នុងរដ្ឋធានី Tirana ផងដែរ៕