វិមានក្រឹមឡាំង នៅថ្ងៃព្រហស្បតិ៍ (ទី១៨ ខែធ្នូ) បានប្រាប់ឲ្យដឹងថា ប្រទេសរុស្ស៊ីកំពុងរៀបចំធ្វើទំនាក់ទំនងជាមួយសហរដ្ឋអាមេរិក ដើម្បីទទួលបានសេចក្ដីលម្អិត អំពីការពិភាក្សារបស់ទីក្រុងវ៉ាស៊ីន ជាមួយមហាអំណាចអឺរ៉ុប និងអ៊ុយក្រែន ស្តីពីលទ្ធភាពនៃការមានដំណោះស្រាយសន្តិភាព ដើម្បីបញ្ចប់ជម្លោះ នៅអ៊ុយក្រែន។

សារព័ត៌មាន Politico បានរាយការណ៍ថា មន្ត្រីអាមេរិក និងរុស្ស៊ី ត្រូវបានគេរំពឹងថា នឹងជួបប្រជុំគ្នានៅទីក្រុង Miami សហរដ្ឋអាមេរិក នាចុងសប្តាហ៍នេះ ហើយថា គណៈប្រតិភូរុស្ស៊ី នឹងរួមបញ្ចូលបេសកជនវិនិយោគរបស់ប្រធានាធិបតីរុស្ស៊ី លោក Vladimir Putin គឺលោក Kirill Dmitriev។

នៅពេលត្រូវបានសួរពីរបាយការណ៍របស់ប្រព័ន្ធផ្សព្វផ្សាយ អំពីកិច្ចប្រជុំ នៅទីក្រុង Miami អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា ទំនាក់ទំនងត្រូវបានគ្រោងទុកធ្វើឡើងជាមួយសហរដ្ឋអាមេរិក។

លោក Peskov បាននិយាយថា៖ «យើងពិតជាកំពុងរៀបចំឲ្យមានទំនាក់ទំនងដ៏ជាក់លាក់ ជាមួយសមភាគីអាមេរិករបស់យើង ដើម្បីទទួលបានសេចក្ដីលម្អិត អំពីលទ្ធផលនៃការងារដែលសហរដ្ឋអាមេរិក បានធ្វើជាមួយអឺរ៉ុប និងអ៊ុយក្រែន»។

សហរដ្ឋអាមេរិក បានជួបពិភាក្សាជាមួយរុស្ស៊ី និងដាច់ដោយឡែកពីគ្នាជាមួយទីក្រុងគីវ និងមេដឹកនាំអឺរ៉ុប ពាក់ព័ន្ធនឹងសំណើបញ្ចប់សង្គ្រាម នៅអ៊ុយក្រែន ប៉ុន្តែមិនទាន់មានកិច្ចព្រមព្រៀងណាមួយ ត្រូវបានសម្រេចឡើងនៅឡើយទេ។

លោក Putin បាននិយាយកាលពីថ្ងៃពុធថា រុស្ស៊ីនឹងដណ្ដើមដែនដីបន្ថែមទៀត នៅអ៊ុយក្រែន ដោយកម្លាំង ប្រសិនបើទីក្រុងគីវ និងអ្នកនយោបាយអឺរ៉ុប ដែលលោកចាត់ទុកជា «ថ្នាក់ដឹកនាំខ្វះបទពិសោធន៍» មិនចូលរួម ពាក់ព័ន្ធនឹងសំណើរបស់សហរដ្ឋអាមេរិក សម្រាប់ដំណោះស្រាយសន្តិភាព៕