ក្រុមបុរាណវិទូអេហ្ស៊ីប បានរកឃើញហ្វូស៊ីលនៃអម្បូរក្រពើដំបូងគេបង្អស់ Dyrosauridae នៅតំបន់វាលខ្សាច់ Western Desert ។

យោងតាមការអះអាងរបស់លោក Hesham Sallam គឺជាសាស្រ្តាចារ្យផ្នែកបុរាណវិទ្យា និងជាស្ថាបនិកបង្កើតមជ្ឈមណ្ឌលបុរាណវិទ្យា Vertebrate នៃសាកលវិទ្យាល័យ Mansoura បានឲ្យដឹងថា ហ្វូស៊ីលរកឃើញថ្មីនៃសត្វក្រពើ Wadisuchus Kassabi ដែលបានរស់នៅកាលពីរយៈពេលប្រហែល ៨០លានឆ្នាំមុន បានជួយឲ្យយល់ដឹងកាន់តែច្បាស់ពីការវិវត្តរបស់សត្វក្រពើ និងបំពេញចន្លោះប្រហោងនៃប្រវត្តិហ្វូស៊ីលនៅអាហ្វ្រិកខាងជើង ។

លោក Sallam និយាយថា របកគំហើញនៅតំបន់នោះ ត្រូវបានគេចាត់ទុកថា ជារបកគំហើញដ៏សំខាន់មួយ មិនត្រឹមតែពីប្រវត្តិជីវិតរបស់សត្វនៅពេលនោះប៉ុណ្ណោះទេ ប៉ុន្តែពីវិធីដែលសត្វចេះសម្របខ្លួន ក្រោយការផុតពូជរបស់សត្វដាយណូស័រផងដែរ ។

លោក Sallam និយាយទៀតថា ហ្វូស៊ីលសត្វក្រពើ Wadisuchus Kassabi ត្រូវបានរកឃើញនៅជិតវាលខ្សាច់ Kharga និងវាលខ្សាច់ Baris ស្ថិតនៅតំបន់វាលខ្សាច់ Western Desert រួមទាំងលលាដ៏ក្បាល ២ផ្នែក និងចុងច្រមុះវែងចំនួន ២ តំណាងឲ្យសត្វចំនួន ៤ នៅដំណាក់កាលខុសគ្នានៃការលូតលាស់របស់ពួកវា ។

របកគំហើញថ្មីនេះដែរ បង្ហាញថា សត្វក្រពើ Wadisuchus Kassabi គឺជាអម្បូរសត្វល្មូនដូចជាក្រពើមានបណ្តោយប្រវែង ៣,៥-៤ម៉ែត្រ មានច្រមុះ និងកន្ទុយវែង និងធ្មេញស្រួច ៕