​​មី​យ៉ាន់​ម៉ា៖ កាលពី​ថ្ងៃ​ច័ន្ទ ​តុលាការ​ទីក្រុង​ណៃ​ពិដោ​បាន​ពន្យា​ពេល​សវនាការ​ សម្រាប់​មេដឹកនាំ​មី​យ៉ាន់​ម៉ា​ដែល​ត្រូវ​បាន​ឃុំខ្លួន​ ដោយសារតែ​ការ​កាត់ផ្ដាច់​បណ្ដាញ​អ៊ីនធឺណិត​ តាម​ទូរ​ស័ព្ទ​ដៃ​របស់​ប្រទេស​នេះ ​បាន​ធ្វើ​ឲ្យ​ដំណើរការ​បើក​សវនាការ​តាម​វីដេអូ​ មិន​អាច​ធ្វើ​ទៅ​បាន​។

​លោកស្រី ​Suu Kyi​ និង​លោក​ប្រធានាធិបតី ​Win Myint​ ត្រូវ​បាន​ឃុំខ្លួន ​ក្នុង​អំឡុង​ការ​ដណ្ដើម​ក្ដោប​ក្ដាប់​អំណាច​ពី​យោធា​កាលពី​ថ្ងៃ​ទី១ ខែ​កុម្ភៈ ហើយ​ត្រូវ​បាន​ចោទប្រកាន់​ពី​បទ​ឧក្រិដ្ឋ​ជាច្រើន​ករណី​ ដែល​អ្នកគាំទ្រ​របស់​មេដឹកនាំ​ទាំង​២ ​ជឿ​ថា​ ជា​លេស​នយោបាយ​ដើម្បី​ឃុំខ្លួន​អ្នក​ទាំង​២​។​ រដ្ឋាភិបាល​យោធា ​បាន​កាត់​ផ្តាច់​បណ្ដាញ​អ៊ីនធឺណិត​កាលពី​ថ្ងៃ​ច័ន្ទ ទំនងជា​យុទ្ធវិធី​មួយ​ដើម្បី​កុំ​ឲ្យ​បែក​ធ្លាយ​រូប​ភាព​នៃ​ការ​តវ៉ា ​និង​ការ​បង្ក្រាប​ដោយ​ហិង្សា​របស់​កងកម្លាំង​សន្តិសុខ​ ទៅដល់​ពិភព​ខាងក្រៅ​តាមរយៈ​ការផ្សាយ​ផ្ទាល់​។​ មេធាវី​របស់​លោក​ស្រី​ Suu Kyi គឺ​លោក ​Khin Maung Zaw បាន​បញ្ជាក់​ប្រាប់​ក្រុម​អ្នក​សារព័ត៌មាន​ថា ថ្ងៃនេះ​ពុំ​មាន​ការ​បើក​សវនាការ​តាម​វីដេអូ​ ដូច​ដែល​អ្នក​ទាំង​អស់​គ្នា​ដឹង​ហើយ​ថា ​មិន​មាន​អ៊ីនធឺណិត។​

​តុលាការ​បាន​កំណត់​កាលបរិច្ឆេទ​ថ្មី ​នៅ​ថ្ងៃ​ទី​២៤ ខែ​មីនា​សម្រាប់​សវនាការ​បន្ទាប់​។​ ទោះបី​មានការ​ប៉ុនប៉ង​ ដោយ​កង​ក​ម្លាំ​ងបង្ក្រាប​ពី​សំណាក់​យោធា​ ក្នុង​ការ​បង្កើន​ការ​ប្រឆាំង​ក្រុម​អ្នក​តវ៉ា​ក៏ដោយ ក៏​ក្រុម​បាតុករ​ដែល​ទាមទារ​ឲ្យ​ដោះ​លែង​លោកស្រី​ Aung San Suu Kyi ​បាន​ចេញ​តវ៉ា​នៅ​តាម​ផ្លូវ​នានា​ ក្នុង​ទូទាំង​សហភាព​មី​យ៉ាន់​ម៉ាអស់​រយៈពេល ៦​សប្តាហ៍​មក​ហើយ៕

អត្ថបទ៖ សុខមាន