យោធាសហរដ្ឋអាមេរិក បាននិយាយថា ខ្លួនបានសម្លាប់ជនល្មើសជួញដូរគ្រឿងញៀនចំនួន ៥នាក់ បន្ថែមទៀត ក្នុងការវាយប្រហារលើនាវា ២គ្រឿង នៅមហាសមុទ្រប៉ាស៊ីហ្វិក នៅថ្ងៃព្រហស្បតិ៍ (១៨ ធ្នូ) សប្ដាហ៍នេះ ដែលនាំឱ្យចំនួនអ្នកស្លាប់សរុបក្នុងយុទ្ធនាការទប់ស្កាត់លំហូរគ្រឿងញៀនរបស់ទីក្រុងវ៉ាស៊ីនតោន កើនឡើងដល់ជាង ១០០នាក់។

បញ្ជាការភាគខាងត្បូងរបស់សហរដ្ឋអាមេរិក បាននិយាយនៅលើបណ្ដាញសង្គម X ថា “ភេរវករគ្រឿងញៀនភេទប្រុស សរុបចំនួន ៥នាក់ ត្រូវបានសម្លាប់ ក្នុងអំឡុងពេលសកម្មភាពវាយប្រហារទាំងនេះ - ដែល ៣នាក់នៅក្នុងនាវាទីមួយ និងពីរនាក់ទៀតនៅក្នុងនាវាទីពីរ ហើយពុំមានកងកម្លាំងយោធាអាមេរិកណាម្នាក់រងរបួសនោះទេ”។

រដ្ឋបាលរបស់លោកប្រធានាធិបតី Donald Trump បានធ្វើការវាយប្រហារបែបនេះនៅសមុទ្រការ៉ាអ៊ីប និងមហាសមុទ្រប៉ាស៊ីហ្វិកភាគខាងកើត នៅជិតវ៉េស៊ុយអេឡា ចាប់តាំងពីខែកញ្ញា មក។ យោងតាមតួលេខរបស់ទីភ្នាក់ងារសារព័ត៌មានបារាំង (Agence France-Press) ដែលផ្អែកលើទិន្នន័យផ្លូវការ បានឱ្យដឹងថា ការវាយប្រហារគិតមកទល់សប្ដាហ៍នេះ បានសម្លាប់មនុស្ស ១០៤នាក់ហើយ។

ភាពតានតឹងកំពុងតែកើនឡើងខ្ពស់រវាងទីក្រុងវ៉ាស៊ីនតោន និងទីក្រុងការ៉ាកាស ជាមួយនឹងវត្តមានយោធាទ្រង់ទ្រាយធំរបស់អាមេរិក នៅភាគខាងត្បូងតំបន់ការ៉ាអ៊ីប ការវាយប្រហារលើទូកដែលសង្ស័យថាជួញដូរគ្រឿងញៀន និងការព្រមានជាបន្តបន្ទាប់ពីលោក Trump លើវ៉េណេស៊ុយអេឡា៕