មន្ត្រីស៊ីរី ឃើដ និងសហរដ្ឋអាមេរិក កំពុងប្រញាប់ប្រញាល់មុនកាលកំណត់ចុងឆ្នាំ ដើម្បីបង្ហាញពីវឌ្ឍនភាពមួយចំនួន នៅក្នុងកិច្ចព្រមព្រៀងដែលជាប់គាំង ក្នុងគោលបំណងបញ្ចូលកងកម្លាំងឃើដជាមួយរដ្ឋ   ស៊ីរី។ នេះបើយោងតាមមនុស្សជាច្រើនដែលពាក់ព័ន្ធ ឬដឹងអំពីការចរចានេះ។ 

យោងតាមប្រភពព័ត៌មានស៊ីរី ឃើដ និងលោកខាងលិច ដែលបាននិយាយទៅកាន់សារព័ត៌មានរ៉យទ័រ បានឲ្យដឹងថា ការពិភាក្សាបានកើនឡើងក្នុងរយៈពេលប៉ុន្មានថ្ងៃថ្មីៗនេះ ទោះបីជាមានការខកចិត្តកាន់តែខ្លាំងឡើងចំពោះការពន្យារពេលក៏ដោយ ដែលអ្នកខ្លះបានព្រមានថា ការទម្លាយភាពជាប់គាំងដ៏សំខាន់មួយ មិនទំនងកើតឡើងនោះទេ។

ប្រភពព័ត៌មានចំនួន៥ បាននិយាយថា រដ្ឋាភិបាលស៊ីរីបណ្តោះអាសន្នបានបញ្ជូនសំណើមួយទៅកាន់កងកម្លាំងប្រជាធិបតេយ្យស៊ីរី (SDF) ដែលដឹកនាំដោយឃើដដែលគ្រប់គ្រងភាគឦសានរបស់ប្រទេសនេះ។

មន្ត្រីស៊ីរីម្នាក់ លោកខាងលិចម្នាក់ និងមន្ត្រីឃើដ បីនាក់ បានបញ្ជាក់ថា នៅក្នុងសំណើនោះ ទីក្រុងដាម៉ាសបានបង្ហាញពីភាពបើកចំហចំពោះ កងកម្លាំងប្រជាធិបតេយ្យស៊ីរី (SDF)ក្នុងការរៀបចំឡើងវិញនូវយុទ្ធជនប្រហែល ៥០.000នាក់របស់ខ្លួន ទៅជាកងពលធំសំខាន់ៗចំនួនបី និងកងពលតូចតូចៗ ដរាបណាពួកគេប្រគល់អង្គភាពមួយចំនួន និងបើកទឹកដីរបស់ខ្លួនទៅឲ្យអង្គភាពកងទ័ពស៊ីរីផ្សេងទៀត៕