រដ្ឋមន្ត្រីហិរញ្ញវត្ថុអង់គ្លេស លោកស្រី Rachel Reeves នៅថ្ងៃសុក្រ (ទី១៩ ខែធ្នូ) នេះ បានស្វាគមន៍ការសម្រេចរបស់បណ្ដាមេដឹកនាំសហភាពអឺរ៉ុប (EU) ក្នុងការផ្ដល់ប្រាក់កម្ចីចំនួន ៩០ពាន់លានអឺរ៉ូ (១០៥ ពាន់លានដុល្លារ) ដល់អ៊ុយក្រែន ដើម្បីផ្តល់មូលនិធិការពារប្រឆាំងនឹងរុស្ស៊ី។

តាមរយៈការបង្ហោះនៅលើបណ្ដាញសង្គម X លោកស្រី Reeves បានលើកឡើងថា៖ «ខ្ញុំរីករាយដែលឃើញកិច្ចព្រមព្រៀងនេះកើតឡើងនៅថ្ងៃនេះ នៅឯកិច្ចប្រជុំក្រុមប្រឹក្សាអឺរ៉ុប ក្នុងការផ្តល់ការគាំទ្រផ្នែកហិរញ្ញវត្ថុដ៏សំខាន់ សម្រាប់អ៊ុយក្រែន»។

លោកស្រីបានឲ្យដឹងបន្ថែមនៅក្នុងការបង្ហោះសារនោះថា៖ «យើងនឹងធ្វើការជាមួយដៃគូ ដើម្បីពិចារណាជាបន្ទាន់នូវជម្រើស ដើម្បីធានាឲ្យបានថា អ៊ុយក្រែនទទួលបានមូលនិធិដែលខ្លួនត្រូវការ»។

គួរបញ្ជាក់ថា បណ្ដាមេដឹកនាំសហភាពអឺរ៉ុប បានសម្រេចខ្ចីសាច់ប្រាក់ ដើម្បីផ្តល់មូលនិធិដល់ការពាររបស់អ៊ុយក្រែន ប្រឆាំងនឹងរុស្ស៊ី សម្រាប់រយៈពេល ២ឆ្នាំខាងមុខ ជាជាងប្រើប្រាស់ទ្រព្យសម្បត្តិបង្កករបស់រុស្ស៊ី ដោយទុកដោយឡែកនូវការបែកបាក់ ជុំវិញផែនការមិនធ្លាប់មានពីមុនមក ក្នុងការផ្តល់ហិរញ្ញប្បទានដល់ទីក្រុងគីវ ជាមួយនឹងសាច់ប្រាក់អធិបតេយ្យភាពរបស់រុស្ស៊ី៕