បាល់ទាត់៖ យោងតាមសេចក្តីរាយការណ៍ របស់សារព័ត៌មានជប៉ុនក្យូដូឲ្យដឹងថា អតីតកីឡាករជម្រើសជាតិជប៉ុន និងបច្ចុប្បន្នជាអ្នកចាត់ការក្រុមជម្រើសជាតិកម្ពុជា Keisuke Honda នឹងចុះហត្ថលេខាជាមួយក្លិបបាល់ទាត់ក្នុងលីគកំពូល នៃប្រទេសអាស៊ៃបៃហ្សង់ Neftci PFK ក្នុងរយៈពេលប៉ុន្មានថ្ងៃខាងមុខនេះ។
Honda វ័យ ៣៤ឆ្នាំដែលក្លិបមានមូលដ្ឋាននៅទីក្រុងបាគូនិយាយថា កំពុងស្ថិតនៅអាស៊ៃបៃហ្សង់ គ្មានក្លិបលេងតាំងតែចាកចេញពីក្លិបប្រេស៊ីល Botafogo ឆ្នាំកន្លងទៅ។ ក្រោយមក រូបគេបានបង្ហាញខ្លួននៅក្នុងក្លិប Portimonense របស់ប្រទេសព័រទុយហ្កាល់ តែបានបញ្ចប់កិច្ចសន្យាវិញ បន្ទាប់ពីក្លិបមិនអាចចុះឈ្មោះទាន់ពេល។ អាស៊ែបៃហ្សង់ជាប្រទេសទី៧ ផ្សេងគ្នាដែល Honda លេងឲ្យបន្ទាប់ពីធ្លាប់លេងឲ្យក្លិបនៅហូឡង់ រុស្ស៊ី អ៊ីតាលីម៉ិចស៊ិក អូស្ត្រាលី និងប្រេស៊ីល។ សូមជម្រាបជូនថា Honda ដែលឥឡូវនេះជាអ្នកចាត់ការក្រុមជម្រើសជាតិកម្ពុជា ជាកីឡាករជប៉ុនតែមួយគត់ដែលរកបានគ្រាប់បាល់ ក្នុងព្រឹត្តិការណ៍បាល់ទាត់ពិភពលោក ៣ផ្សេងគ្នា។
និយាយពីបាល់ទាត់កម្ពុជាអ្វីដែលគូរឲ្យកត់សម្គាល់ ក្រោមការដឹកនាំបង្ហាត់បង្ហាញពី Honda និងលោក Felix Dalmas ក្រុមបាល់ទាត់កម្ពុជាធ្វើបានល្អក្នុងប្រវត្តិសាស្ត្រ ដោយឡើងទៅវគ្គពាក់កណ្តាលផ្តាច់ព្រ័ត្រកីឡាស៊ីហ្គេម ២០១៩ នៅប្រទេសហ្វីលីពីន។ ប៉ុន្តែសម្រាប់យុទ្ធនាការជម្រុះបាល់ទាត់ពិភពលោក ២០២២ និងជើងឯកអាស៊ី២០២៣ ជម្រើសជាតិកម្ពុជាធ្វើមិនបានល្អទេ ៥ប្រកួតស្មើតែ ១ប្រកួតទេក្រៅពីនោះចាញ់។ យ៉ាងណាក៏ដោយក្នុងសន្និបាតសហព័ន្ធកីឡាបាល់ទាត់កម្ពុជា ក្រុមការងាររបស់ Keisuke Honda បានប្តេជ្ញាចិត្តខ្ពស់ស្វែងរកមេដាយស៊ីហ្គេម ឲ្យបានពេលកម្ពុជាធ្វើម្ចាស់ផ្ទះឆ្នាំ២០២៣ ខាងមុខនេះ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
