យោងតាមក្រុមអាជ្ញាធរសុខាភិបាលហ្កាហ្សាកាលពីថ្ងៃសៅរ៍បានឲ្យដឹងថា ចំនួនអ្នកស្លាប់ និងរបួសសរុបក្នុងតំបន់ហ្កាហ្សាបានកើនឡើងជាង ២៤០.០០០ នាក់ចាប់តាំងពីជម្លោះរវាងក្រុមហាម៉ាស និងអ៊ីស្រាអែល បានផ្ទុះឡើងនៅថ្ងៃទី ៧ តុលា ឆ្នាំ ២០២៣។

ទិន្នន័យបានបង្ហាញថា ក្នុងរយៈពេល ៤៨ ម៉ោងកន្លងមកនេះ សាកសពចំនួន ១៣ នាក់ត្រូវបានបញ្ជូនទៅកាន់មន្ទីរពេទ្យហ្កាហ្សា ក្នុងនោះអ្នកស្លាប់ថ្មីចំនួន ៦ នាក់ ត្រូវបានរាយការណ៍ និង ៧ នាក់ត្រូវបានទាញចេញពីគំនរថ្មបាក់បែក ដែលធ្វើឱ្យចំនួនអ្នកស្លាប់សរុបកើនឡើងដល់ ៧០.៩២៥ នាក់ ដោយមានមនុស្ស ១៧១.១៨៥ នាក់រងរបួស។

ក្រុមអាជ្ញាធរបាននិយាយថា ជនជាតិប៉ាឡេស្ទីនចំនួន ៤០១ នាក់នៅក្នុងតំបន់នេះ ត្រូវបានសម្លាប់ និង ១.១០៨ នាក់ផ្សេងទៀតរងរបួសដោយការវាយប្រហាររបស់អ៊ីស្រាអែលចាប់តាំងពីកិច្ចព្រមព្រៀងឈប់បាញ់ចូលជាធរមាននៅថ្ងៃទី ១០ ខែតុលា ២០២៥នេះ ។

ទន្ទឹមនឹងនេះ ស្ថានភាពមនុស្សធម៌ក្នុងតំបន់ហ្កាហ្សានៅតែយ៉ាប់យ៉ឺន ទោះបីជាការគំរាមកំហែងភ្លាមៗនៃទុរ្ភិក្សបានធូរស្រាលក៏ដោយ។

អគ្គលេខាធិការអង្គការសហប្រជាជាតិ លោក Antonio Guterres បានព្រមានកាលពីថ្ងៃសុក្រថា មនុស្សប្រហែល ១,៦ លាននាក់ ច្រើនជាង ៧៥ ភាគរយនៃចំនួនប្រជាជននៅតំបន់ហ្កាហ្សា ត្រូវបានគេព្យាករថានឹងប្រឈមកម្រិតអសន្តិសុខស្បៀងធ្ងន់ធ្ងរ និងហានិភ័យខ្ពស់នៃកង្វះអាហារូបត្ថម្ភ៕