ការលំបាកផ្នែកសេដ្ឋកិច្ច និងការព្រួយបារម្ភអំពីសន្តិសុខកាន់តែកើនឡើងនៅក្នុងប្រទេសអ៊ីរ៉ង់ កំពុងជំរុញឱ្យមានការចាកចេញយ៉ាងច្រើនពីជនអន្តោប្រវេសន៍អាហ្វហ្គានីស្ថាន ដោយមានមនុស្សរាប់ម៉ឺននាក់ចាកចេញពីប្រទេសនេះ ក្នុងរយៈពេលប៉ុន្មានខែថ្មីៗនេះ។

អស់រយៈពេលជាច្រើនទសវត្សរ៍មកហើយ អ៊ីរ៉ង់គឺជាជម្រកសម្រាប់ជនជាតិអាហ្វហ្គានីស្ថានរាប់លាននាក់ដែលរត់គេចពីជម្លោះ ភាពក្រីក្រ និងអស្ថិរភាព។ ទោះជាយ៉ាងណាក៏ដោយ ពេលនេះអ្វីៗកំពុងផ្លាស់ប្តូរយ៉ាងខ្លាំង។

នៅច្រកព្រំដែនភាគខាងកើតដូចជា ច្រក Milak ជនអន្តោប្រវេសន៍ និងជនភៀសខ្លួនអាហ្វហ្គានីស្ថានរាប់ពាន់នាក់កំពុងឆ្លងកាត់ជារៀងរាល់សប្តាហ៍ តាមរយៈដំណើរការសម្រាប់ការនិរទេសត្រឡប់ទៅប្រទេសអាហ្វហ្គានីស្ថានវិញ។

ក្រុមអាជ្ញាធរអ៊ីរ៉ង់បានលើកឡើងពីសម្ពាធសេដ្ឋកិច្ច និងការពិចារណាលើសន្តិសុខជាហេតុផលចម្បងសម្រាប់វិធានការទាំងនេះ។

ជនអន្តោប្រវេសន៍ម្នាក់បាននិយាយថា រូបគេបានមកដល់ប្រទេសអ៊ីរ៉ង់ ប៉ុន្តែបានរកឃើញថាស្ថានភាពការងារមិនមែនជាទីពេញចិត្តឡើយ។ ដោយសារតម្លៃរូបិយប័ណ្ណអ៊ីរ៉ង់ទាប ការស្នាក់នៅទីនេះលែងសមហេតុផលទៀតហើយ។ រូបគេនឹងត្រលប់ទៅប្រទេសអាហ្វហ្គានីស្ថានវិញ ដើម្បីបើកហាងផ្ទាល់ខ្លួន៕