ភ្នំពេញ ៖ ដើម្បីចូលរួមគាំទ្រការគ្រប់គ្រងសំណល់ក្នុងសហគមន៍ឱ្យបានកាន់តែប្រសើរនៅក្នុងប្រទេសកម្ពុជា ក្រុមហ៊ុន កូកា-កូឡា កម្ពុជា កំពុងធ្វើការងារយ៉ាងជិតស្និទ្ធជាមួយ រដ្ឋបាលរាជធានីភ្នំពេញ ដើម្បីដាក់ពង្រាយធុងបែងចែកសំរាមនៅក្នុងរាជធានីភ្នំពេញ។ ទន្ទឹមនឹងនេះ ក្រុមហ៊ុន បានប្រគល់ធុងបែងចែកសំរាមចំនួន ៥០ឈុត (១៥០ធុង) ជូនរដ្ឋបាល រាជធានី ភ្នំពេញ ដែលនឹងត្រូវដាក់នៅតាមសួនច្បារសាធារណៈធំៗ ក្នុងរាជធានីភ្នំពេញ ដើម្បីជួយជំរុញការអនុវត្តរបស់ប្រជាពលរដ្ឋឱ្យធ្វើការបែងចែកសំរាមឱ្យបានត្រឹមត្រូវ។

​ក្នុងពិធីប្រគល់-ទទួលធុងបែងចែកសំរាមដែលបានរៀបចំធ្វើឡើងដោយក្រុមហ៊ុន កូកា-កូឡា កម្ពុជា និងរដ្ឋបាលរាជធានីភ្នំពេញ ដែលមានការអញ្ជើញចូលរួមពី លោក នួន ផារ័ត្ន អភិបាលរងរាជធានីភ្នំពេញ និងលោក DAVID WIGGLESWORTH អគ្គនាយកប្រតិបត្តិក្រុមហ៊ុន កូកា-កូឡា កម្ពុជា នៅសួនច្បារសម្តេចតេជោ ហ៊ុន សែន ខណ្ឌដូនពេញ រាជធានី ភ្នំពេញ។

លោក DAVID WIGGLESWORTH អគ្គនាយកក្រុមហ៊ុន កូកា-កូឡា កម្ពុជា បានមានប្រសាសន៍ថា កូកា-កូឡា កម្ពុជាក្រោមចក្ខុវិស័យ “ពិភពលោកគ្មានសំរាម” ដើម្បី ឈានទៅសម្រេចបានឱ្យចេញជារូបរាងជាក់ស្តែងនៅកម្ពុជា។ គំនិតផ្តួចផ្តើមនេះ បានដាក់ អនុវត្តន៍ នៅកម្ពុជាចាប់ពីឆ្នាំ២០២០ ក្នុងគោលដៅលើកកម្ពស់ការយល់ ដឹងរបស់ប្រជាពលរដ្ឋ លើការបែងចែក និងកែច្នៃសំណល់ឡើងវិញ។ លើសពីនេះទៀត ក្រុមហ៊ុនបានសហការជាមួយអាជ្ញាធរពាក់ព័ន្ធក្នុងការដាក់ពង្រាយធុងសំរាម ប្រមាណ៨៥០ធុង នៅតាមទីសាធារណៈ ផ្សារ សាលារៀននានា ចំនួន ១២០ទីតាំងនៅទូទាំងប្រទេសរួចមកហើយ។

ជាមួយគ្នានោះដែរ លោក នួន ផារ័ត្ន បានលើកឡើងថា រដ្ឋបាលរាជធានីភ្នំពេញ បានកំណត់យុទ្ធសាស្ត្រកាត់បន្ថយ និងគ្រប់គ្រងកាកសំណល់ ដោយចាប់ផ្តើមពីការអប់រំប្រជាពលរដ្ឋ អំពីការគ្រប់គ្រងសំរាមរបស់ខ្លួន។ យើងគាំទ្រដល់ចក្ខុវិស័យរបស់វិស័យឯកជន រួមទាំងក្រុមហ៊ុន កូកា-កូឡា ក្នុងការរួមចំណែកឆ្ពោះទៅរកសហគមន៍កាន់តែស្អាត និងបៃតងនៅក្នុងរាជធានីភ្នំពេញ។ ក្នុងន័យនេះ ចក្ខុវិស័យរបស់ក្រុមហ៊ុន កូកា-កូឡាកម្ពុជា ពិតជាបានចូលរួមចំណែកក្នុងការគាំទ្រដល់ការអនុវត្តផែនការយុទ្ធសាស្រ្ត របស់រដ្ឋបាលរាជធានីភ្នំពេញ និងជាពិសេសរបស់រាជរដ្ឋាភិបាលកម្ពុជាក្នុងការគ្រប់គ្រង បរិស្ថាន។ ក្នុងនាមរដ្ឋបាលរាជធានីភ្នំពេញ សូមកោតសរសើរ ចំពោះ កិច្ចប្រឹងប្រែងរបស់ក្រុមហ៊ុន កូកា-កូឡា កម្ពុជា ក្នុងការលើកកម្ពស់ការបែងចែកសំរាម ឱ្យបានត្រឹមត្រូវ និងការប្រមូលសំរាមនៅក្នុងសហគមន៍។ យើងសង្ឃឹមថា ប្រជាពលរដ្ឋ និងសហគមន៍កាន់តែច្រើនថែមទៀត នឹងចូលរួមធ្វើការងារជាមួយយើងក្នុងការការពារ បរិស្ថាន របស់យើង ដោយចាប់ផ្តើមចេញពីទង្វើសាមញ្ញដោយគ្រាន់តែបែងចែកសំរាម ឱ្យបាន ត្រឹមត្រូវ និងការកែច្នៃសំរាមឡើងវិញ។

សូមបញ្ជាក់ថា ក្រុមហ៊ុន កូកា-កូឡា កម្ពុជា បន្តពន្លឿនកិច្ចប្រឹងប្រែងរបស់ខ្លួន ក្នុងការប្រមូល និងកែច្នៃឡើងវិញនៅទូទាំងប្រទេស។ នៅដើមឆ្នាំ២០២០ ក្រុមហ៊ុនបាន ចេញ លក់ ទឹកពិសាដាសានីចំណុះ ៣៥០ មីលីលីត្រ ដែលមានសំបកដបដំបូងផលិតពី ប្លាស្ទិកដែលបានកែច្នៃរួច ១០០ភាគរយឬហៅថា «Recycled PET / rPET»។ គិតត្រឹម ឆ្នាំ២០២១ តាមរយៈកិច្ចសហការជាមួយដៃគូអាជីវកម្ម និងក្រុមហ៊ុនដៃគូកែច្នៃប្លាស្ទិក កូកា-កូឡា កម្ពុជាបានប្រមូល និងកែច្នៃសំណល់ប្លាស្ទិក បានចំនួន ១ ៤៥០ តោន៕ អត្ថបទ ៖ រដ្ឋា