យោងតាមនាយករដ្ឋមន្ត្រីលីបង់ លោក Nawaf Salam បានឲ្យដឹងថា ប្រទេសលីបង់ជិតបញ្ចប់ការរំសាយអាវុធរបស់ក្រុមហេសបូឡានៅភាគខាងត្បូងនៃទន្លេលីតានី(Litani) មុនកាលកំណត់ចុងឆ្នាំនេះ ជាផ្នែកមួយនៃកិច្ចព្រមព្រៀងឈប់បាញ់ជាមួយអ៊ីស្រាអែល។

សេចក្តីថ្លែងការណ៍កាលពីថ្ងៃសៅរ៍ កើតឡើងនៅពេលប្រទេសនេះកំពុងព្យាយាមបំពេញតម្រូវការសំខាន់នៅក្នុងកិច្ចព្រមព្រៀងគាំទ្រដោយសហរដ្ឋអាមេរិកដែលបានព្រមព្រៀងគ្នាកាលពីខែវិច្ឆិកាឆ្នាំមុន និងបានបញ្ចប់ការប្រយុទ្ធគ្នាជាងមួយឆ្នាំរវាងអ៊ីស្រាអែល និងក្រុមហេសបូឡា។

កិច្ចព្រមព្រៀងនេះតម្រូវឱ្យមានការរំសាយអាវុធរបស់ក្រុមប្រដាប់អាវុធលីបង់ដែលមានសម្ព័ន្ធភាពជាមួយអ៊ីរ៉ង់ ដោយចាប់ផ្តើមនៅតំបន់ភាគខាងត្បូងនៃទន្លេនេះ ដែលនៅជាប់នឹងអ៊ីស្រាអែល។

សេចក្តីថ្លែងការណ៍មួយពីការិយាល័យរបស់លោកបាននិយាយថា លោកនាយករដ្ឋមន្ត្រី Salam បានបញ្ជាក់ថាដំណាក់កាលទីមួយនៃផែនការរំសាយអាវុធដែលទាក់ទងនឹងតំបន់ភាគខាងត្បូងនៃទន្លេលីតានី គឺនៅសល់តែប៉ុន្មានថ្ងៃទៀតប៉ុណ្ណោះនឹងបញ្ចប់។

សេចក្ដីថ្លែងការណ៍ដដែលនេះ បានកើតមានឡើងបន្ទាប់ពីលោក Salam បានជួបពិភាក្សាជាមួយ លោក Simon Karam អ្នកចរចាស៊ីវិលជាន់ខ្ពស់របស់ប្រទេសលីបង់ លើការប្ដេជ្ញាចិត្តតាមដានបទឈប់បាញ់រវាងក្រុមហេសបូឡា និង អ៊ីស្រាអែល៕