ក្រុមសកម្មជនរាប់ពាន់នាក់ មកពីទូទាំងប្រទេសស៊ែរប៊ី បានចូលរួមក្នុងបាតុកម្មរបស់និស្សិត នៅភាគនិរតីនៃប្រទេសនេះ កាលពីថ្ងៃអាទិត្យ (២១ ធ្នូ) ដោយប្រមូលផ្តុំគ្នាដើម្បីតវ៉ាប្រឆាំងនឹងអ្វីដែលពួកគេពិពណ៌នាថា ជាសម្ពាធរបស់រដ្ឋាភិបាលស៊ែរប៊ី ទៅលើសកលវិទ្យាល័យរដ្ឋ ជុំវិញសោកនាដកម្មស្ថានីយ៍នៅរថភ្លើងដ៏ចម្រូងចម្រាស។

បាតុកម្មនេះ ជាផ្នែកមួយនៃចលនាយ៉ាងទូលំទូលាយនាពេលកន្លងមក ដែលតតាំងនឹងការជ្រៀតជ្រែកខាងនយោបាយក្នុងវិស័យអប់រំកម្រិតឧត្តមសិក្សា ហើយគឺជាបាតុកម្មលើកដំបូងនៅក្នុងទីប្រជុំជន Novi Pazar ដែលមានប្រជាជនមូស្លីមបូស្នី រស់នៅភាគច្រើន។ បាតុកម្មនេះក៏ជាការតវ៉ាមួយក្នុងចំណោមការតវ៉ាជាច្រើនកន្លងមក ដែលកើតមានបន្ទាប់ពីហេតុការណ៍បាក់រលំដំបូលស្ថានីយ៍រថភ្លើងកាលពីឆ្នាំ២០២៤ នៅទីក្រុង Novi Sad ភាគខាងជើង ដែលបានសម្លាប់មនុស្ស ១៦នាក់។

ក្រុមនិស្សិតតវ៉ា មកពីទីប្រជុំជន Novi Pazar បាននិយាយថា រដ្ឋបាលសកលវិទ្យាល័យរដ្ឋទាំងនោះ បានដកហូតឋានៈនិស្សិតធម្មតា របស់អ្នកដែលអវត្តមានដោយសារទៅចូលរួមការតវ៉ា និងបានបណ្តេញសាស្ត្រាចារ្យអស់រាប់សិបនាក់ចេញពីការងារ។ ក្រុមបាតុករទាំងនោះកំពុងទាមទារឱ្យគណៈគ្រប់គ្រងសកលវិទ្យាល័យលាលែងចេញពីតំណែង បញ្ឈប់សម្ពាធ និងបោះឆ្នោតជ្រើសរើសសកលវិទ្យាធិការថ្មី។

អំឡុងការតវ៉ាពេញមួយថ្ងៃអាទិត្យ អ្នកចូលរួមបានប្រមូលផ្សុំគ្នាគ្រវីទង់ ដែលតំណាងឱ្យទីប្រជុំជន និងសកលវិទ្យាល័យរបស់ពួកគេ ផ្លុំកញ្ចែ និងស្រែកពាក្យតវ៉ាយ៉ាងពុះកញ្រ្ចោលពាសពេញដងផ្លូវ៕