ប្រភពដែលដឹងពីចារកម្មអាមេរិក បានប្រាប់សារព័ត៌មានរ៉យទ័រថា របាយការណ៍ចារកម្មសហរដ្ឋអាមេរិក នៅតែបន្តព្រមានថា ប្រធានាធិបតីរុស្ស៊ី លោក Vladimir Putin មិនបានបោះបង់ចោលគោលបំណងរបស់លោក ក្នុងការដណ្តើមយកទឹកដីអ៊ុយក្រែនទាំងមូល និងទាមទារយកផ្នែកខ្លះនៃទ្វីបអឺរ៉ុប ដែលធ្លាប់ជាកម្មសិទ្ធិរបស់អតីតចក្រភពសូវៀតនោះទេ ទោះបីជាកិច្ចប្រឹងប្រែងសន្តិភាពមានសន្ទុះក៏ដោយ។

របាយការណ៍ចារកម្មនេះ បង្ហាញពីរូបភាពខុសគ្នាយ៉ាងខ្លាំងពីអ្វីដែលលើកឡើងដោយលោកប្រធានាធិបតីអាមេរិក Donald Trump និងក្រុមអ្នកចរចាសន្តិភាពអ៊ុយក្រែនរបស់លោក ដែលតែងតែនិយាយថា លោក Putin ចង់បញ្ចប់ជម្លោះ។ ប្រភពបញ្ជាក់ថា របាយការណ៍ចារកម្មថ្មីៗបំផុត ចុះកាលបរិចេ្ឆទនៅចុងខែកញ្ញា ឆ្នាំ២០២៥ នេះ។

ដំណឹងសម្ងាត់របស់អាមេរិកមានភាពស៊ីសង្វាក់គ្នារហូតមក ចាប់តាំងពីលោក Putin បើកយុទ្ធនាការយោធាទ្រង់ទ្រាយធំនៅឆ្នាំ២០២២ លើអ៊ុយក្រែន។ ប្រភពបានឱ្យដឹងថា របាយការណ៍ចារកម្មភាគច្រើនស្របនឹងទស្សនៈរបស់មេដឹកនាំអឺរ៉ុប និងភ្នាក់ងារចារកម្មទៀតដែលថា លោក Putin ចង់បានអ៊ុយក្រែនទាំងមូល និងទឹកដីនៃរដ្ឋប្លុកសូវៀតពីមុន រួមទាំងសមាជិកនៃសម្ព័ន្ធណាតូផងដែរ។ លោក Putin បានលើកឡើងថា រូបលោកពុំមានបំណងវាយប្រហារសមាជិកណាតូនោះទេ។

លោក Mike Quigley សមាជិកគណៈកម្មាធិការចារកម្មនៃសភាអាមេរិក បាននិយាយក្នុងបទសម្ភាសន៍ជាមួយរ៉យទ័រថា "ចារកម្មតែងតែចង្អុលបង្ហាញថា លោក Putin ចង់បានច្រើនជាងនេះ"។

គួរឱ្យដឹងថា បច្ចុប្បន្នយោងតាមប្រភពបើកចំហ រុស្ស៊ីគ្រប់គ្រងប្រហែល ២០% ទៅហើយនៃទឹកដីអ៊ុយក្រែន រួមទាំងភាគច្រើននៃតំបន់ Luhansk និង Donetsk ជាខេត្តឧស្សាហកម្មនៃតំបន់ Donbas ដ៏ទូលំទូលាយរបស់អ៊ុយក្រែន ផ្នែកខ្លះនៃតំបន់ Zaporizhzhia និង Kherson ព្រមទាំងឧបទ្វីបគ្រីម៉េ ដែលជាតំបន់យុទ្ធសាស្ត្រសមុទ្រខ្មៅផងដែរ៕