ស៊ីហ្គេម៖ កម្ពុជានឹងធ្វើការស្នើសុំផ្នែកប្រែប្រួលធាតុអាកាសកីឡា ឬផ្នែកកីឡាបៃតងនៃអង្គការសហប្រជាជាតិ (UN) ដើម្បីទទួលបានគោលការណ៍ និងការទទួលស្គាល់ក្នុងការរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ គឺជាព្រឹត្តិការណ៍កីឡាបៃតង។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) កាលពីថ្មីៗ។
ឯកឧត្តមបានគូសបញ្ជាក់ថា កីឡាបៃតងគឺជាធាតុមួយដ៏សំខាន់ ក្នុងនាមម្ចាស់ផ្ទះព្រឹត្តិការណ៍ជាប្រវត្តិសាស្ដ្រឆ្នាំ២០២៣ ហើយបើកម្ពុជារៀបចំព្រឹត្តិការណ៍កីឡាបៃតងនេះទទួលបានជោគជ័យ នោះក៏ជាកិត្តិយសមួយដ៏ធំសម្រាប់ម្ចាស់ផ្ទះ ដែលនឹងទទួលបានការកោតសរសើរពីអន្ដរជាតិ ចំពោះកម្ពុជាដែលបានយល់ច្បាស់ពីអត្ថប្រយោជន៍នៃភាពបៃតង ដែលជាភាពសុខដុមរមនានៃជីវិតរបស់មនុស្សលើពិភពលោក។ ទន្ទឹមជាមួយការកំណត់គោលការណ៍រៀបចំព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នៅកម្ពុជាគឺជាព្រឹត្តិការណ៍កីឡាបៃតងនេះដែរ គណៈកម្មាធិការជាតិ CAMSOC ក៏បានអំពាវនាវឲ្យថ្នាក់ដឹកនាំ ស្ថាប័នពាក់ព័ន្ធ ពិសេសប្រជាពលរដ្ឋ ចូលរួមយុទ្ធនាការនេះទាំងអស់គ្នាដើម្បីទទួលបាននូវបរិស្ថានស្អាត និងភាពបៃតង ក្នុងការត្រៀមខ្លួនធ្វើម្ចាស់ផ្ទះព្រឹត្តិការណ៍ជាប្រវត្តិសាស្ដ្រលើកដំបូង ក្រោយរងចាំអស់ ៦៤ឆ្នាំ។
សូមបញ្ជាក់ថា កីឡាស៊ីហ្គេមលើកទី៣២ នៅកម្ពុជា ត្រូវបានរាជរដ្ឋាភិបាលកំណត់រៀបចំពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ នៅទីតាំងគោលដៅធំៗចំនួន ៥ រួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពត ខេត្តកែប និងខេត្តកំពង់ស្ពឺ មុនបន្ដរៀបចំការប្រកួតកីឡាអាស៊ានប៉ារ៉ាហ្គេមលើកទី១២ ចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ដដែល៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
