ប្រជាជនប៉ាឡេស្ទីន ជាងកន្លះលាននាក់ បានបាត់បង់ប្រភពចំណូលសម្រាប់ជីវភាពរស់នៅរបស់ពួកគេ នៅក្នុងតំបន់កាន់កាប់ វេសបែង និងដែនដីហ្កាហ្សា ចាប់តាំងពីការចាប់ផ្តើមនៃសង្គ្រាមអ៊ីស្រាអែល ប្រឆាំងនឹងក្រុមហាម៉ាស នៅក្នុងខែតុលា ឆ្នាំ២០២៣ មក។

ក្នុងសេចក្តីថ្លែងការណ៍មួយចេញផ្សាយនៅថ្ងៃសៅរ៍ (២០ ធ្នូ) សហព័ន្ធសហជីពរបស់ប៉ាឡេស្ទីន បាននិយាយថា កម្មករប្រឈមមុខនឹងការបិទផ្លូវទាំងស្រុងជាប្រព័ន្ធ ការបិទច្រកឆ្លងកាត់ និងការវាយឆ្មក់ប្រចាំថ្ងៃ ដោយកងទ័ពអ៊ីស្រាអែល។

សេចក្តីថ្លែងការណ៍ និយាយថា គោលនយោបាយរបស់អ៊ីស្រាអែល អស់ពេលជាង ២ឆ្នាំនៃសង្រ្គាមជាបន្តបន្ទាប់ បាននាំឱ្យកម្មករប៉ាឡេស្ទីនជាង ៥សែននាក់ បាត់បង់ប្រភពចំណូលសម្រាប់ការរស់នៅរបស់ពួកគេ ជាមួយនឹងអត្រាអត់ការងារធ្វើ កើនឡើងដល់កម្រិតខ្ពស់បំផុតមិនធ្លាប់មាន ពោលគឺលើសពី ៥០% នៅក្នុងតំបន់ វេសបែង និងជាង ៨៤% នៅក្នុងតំបន់ហ្កាហ្សា។

របាយការណ៍បន្តថា កម្មករប៉ាឡេស្ទីន បានខាតបង់ជាង ៩ ពាន់លានដុល្លារ ដោយសារតែត្រូវបានរារាំងមិនឱ្យទៅដល់កន្លែងធ្វើការរបស់ពួកគេ បន្ថែមពីលើការបំផ្លិចបំផ្លាញវិស័យផលិតកម្មក្នុងស្រុក ជាចម្បងផ្នែកកសិកម្ម សំណង់ និងសេវាកម្ម ដោយសារតែប្រតិបត្តិការយោធា៕