ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអាទិត្យថា មេបញ្ជាការកងកម្លាំងការពារជាតិប៉ាគីស្ថាន លោកសេនាប្រមុខ Syed Asim Munir បានប្រាប់អាហ្វហ្គានីស្ថានឲ្យជ្រើសរើសរវាងទីក្រុងអ៊ីស្លាម៉ាបាដ និងក្រុមសកម្មប្រយុទ្ធ Tehreek-e-Taliban ប៉ាគីស្ថានខុសច្បាប់។ ខណៈដែលទំនាក់ទំនងរវាងប្រទេសជិតខាងទាំងពីរ នៅតែមានភាពតានតឹង។

កងទ័ព និងរដ្ឋាភិបាលស៊ីវិលប៉ាគីស្ថានបានបន្ទោសតាលីបង់អាហ្វហ្គានីស្ថានថ្មីៗនេះចំពោះការសម្របសម្រួលការវាយប្រហារឆ្លងកាត់ព្រំដែន នៅក្នុងប្រទេសប៉ាគីស្ថាន ជាការចោទប្រកាន់មួយដែលកាប៊ុលបដិសេធ។ អាហ្វហ្គានីស្ថានបាននិយាយថា ខ្លួនមិនអនុញ្ញាតឲ្យទឹកដីរបស់ខ្លួនត្រូវបានប្រើប្រាស់សម្រាប់ការវាយប្រហារប្រឆាំងនឹងប៉ាគីស្ថានទេ ហើយមិនអាចទទួលខុសត្រូវចំពោះបញ្ហាប្រឈមសន្តិសុខរបស់ទីក្រុងអ៊ីស្លាម៉ាបាដបានទេ។

ប្រទេសទាំងពីរបានចូលរួមក្នុងការប្រយុទ្ធគ្នាតាមព្រំដែនកាលពីខែតុលា ដែលទាហានរាប់សិបនាក់ត្រូវបានសម្លាប់ និងរងរបួសទាំងសងខាង។ មន្ត្រីមកពីអាហ្វហ្គានីស្ថាន និងប៉ាគីស្ថាន បានធ្វើកិច្ចចរចាសន្តិភាពនៅប្រទេសកាតា ទួរគី និងអារ៉ាប៊ីសាអ៊ូឌីត ក្នុងរយៈពេលប៉ុន្មានខែកន្លងមកនេះ ប៉ុន្តែមិនបានឈានដល់កិច្ចព្រមព្រៀងទេ។

ប្រព័ន្ធផ្សព្វផ្សាយរដ្ឋ Radio Pakistan បានរាយការណ៍ថា៖«នាយសេនាធិការកងទ័ព និងជាប្រមុខកងកម្លាំងការពារជាតិ លោកសេនាប្រមុខ Syed Asim Munir បាននិយាយថា អាហ្វហ្គានីស្ថាននឹងត្រូវជ្រើសរើសរវាងក្រុមសកម្មប្រយុទ្ធ Tehreek-e-Taliban និងប៉ាគីស្ថាន»។

លោក Munir បានថ្លែងសុន្ទរកថានៅក្នុងសន្និសីទជាតិ Ulema និង Mashaikh នៅទីក្រុងអ៊ីស្លាម៉ាបាដកាលពីដើមខែនេះ។ នេះបើយោងតាមប្រព័ន្ធផ្សព្វផ្សាយរដ្ឋ៕