ប្រទេសចិន នៅថ្ងៃចន្ទ (ទី២២ ខែធ្នូ) នេះ បានប្រាប់ឲ្យដឹងថា ខ្លួននឹងដាក់កាត្វកិច្ចពន្ធបណ្តោះអាសន្ន លើ «ផលិតផលពាក់ព័ន្ធនឹងទឹកដោះគោមួយចំនួន» នាំចូលពីសហភាពអឺរ៉ុប (EU) ជាចំណាត់ការចុងក្រោយបង្អស់ នៅក្នុងជម្លោះពាណិជ្ជកម្ម ដែលរាលដាលចាប់ពីអាហារ រហូតដល់រថយន្តអគ្គិសនី។

«កាតព្វកិច្ចពន្ធបណ្ដោះអាសន្ន» ដែលមានចន្លោះចាប់ពី ២១,៩ភាគរយ ទៅ ៤២,៧ភាគរយ ចូលជាធរមាន នៅថ្ងៃអង្គារ (ទី២៣ ខែធ្នូ)។ ក្រសួងពាណិជ្ជកម្ម នៅទីក្រុងប៉េកាំង បានឲ្យដឹងនៅក្នុងសេចក្តីថ្លែងការណ៍មួយថា ទំនិញជាច្រើនមុខ បានរងប៉ះពាល់ ដែលរួមមានឈីសស្រស់ និងកែច្នៃ ទឹកដោះគោកក ឈីសពណ៌ខៀវ និងទឹកដោះគោ និងក្រែមមួយចំនួន។

ក្រុមមន្ត្រីបានចាប់ផ្តើមការស៊ើបអង្កេត ប្រឆាំងនឹងការឧបត្ថម្ភធន នៅក្នុងខែសីហា ឆ្នាំ២០២៤ បន្ទាប់ពីបានទទួលសំណើពីសមាគមទឹកដោះគោរបស់ប្រទេសចិន។ ការស៊ើបអង្កេត នឹងបញ្ចប់នៅខែកុម្ភៈ។

ក្រសួងពាណិជ្ជកម្មចិន បានឲ្យដឹងនៅថ្ងៃចន្ទនេះថា ការរកឃើញបឋម បានបង្ហាញពីការមានទំនាក់ទំនង រវាងការឧបត្ថម្ភធនរបស់ EU និង «ការខូចខាតយ៉ាងធ្ងន់ធ្ងរ» ចំពោះឧស្សាហកម្មទឹកដោះគោ ក្នុងស្រុករបស់ខ្លួន។

ពន្ធថ្មីលើទឹកដោះគោរបស់ EU កើតឡើងមួយសប្តាហ៍បន្ទាប់ពីទីក្រុងប៉េកាំង បានបញ្ជាក់ថា ខ្លួននឹងដាក់ពន្ធប្រឆាំងការបង្ខូចតម្លៃទីផ្សារ លើការនាំចូលសាច់ជ្រូករបស់ EU សម្រាប់រយៈពេល ៥ឆ្នាំ។ កាតព្វកិច្ចទាំងនោះ បានចាប់ផ្តើមនៅថ្ងៃទី១៧ ខែធ្នូ ហើយមានចាប់ពី ៤,៩ភាគរយ ដល់ ១៩,៨ភាគរយ ដោយថយចុះពីកាតព្វកិច្ចពន្ធបណ្តោះអាសន្ន ចន្លោះពី ១៥,៦ ទៅ ៦២,៤ភាគរយ ដែលបានអនុវត្តតាំងពីខែកញ្ញាមក៕