​រុស្ស៊ី៖ ក្រុមហ៊ុន Bayerische Motoren Werke AG ហៅ​កាត់​ថា BMW​ ដែល​ជា​ក្រុមហ៊ុន​ផលិត​រថយន្ត​ទំនើប​របស់​អាល្លឺម៉ង់​បាន​និយាយ​កាលពី​ថ្ងៃ​អង្គា​រថា ខ្លួន​បាន​បញ្ឈប់​ការនាំចេញ​ផលិតផល​រថយន្ត​ទៅកាន់​ប្រទេស​រុស្ស៊ី ហើយ​នឹង​បញ្ឈប់​ខ្សែ​សង្វាក់​ផលិតកម្ម​យានយន្ត​ជាមួយ​ដៃគូ នៅក្នុងទីក្រុងកាលី​នី​ន​ក្រា​ដ (Kaliningrad) របស់​រុស្ស៊ី​។

​អ្នកនាំពាក្យ​ក្រុមហ៊ុន BMW បាន​និយាយ​ថា​ យើង​ថ្កោលទោស​ការឈ្លានពាន​ចូល​អ៊ុយ​ក្រែ​ន និង​តាមដាន​ការ​វិវឌ្ឍន៍ជា​បន្តបន្ទាប់​ទាំង​ក្ដីបារម្ភ និង​រន្ធត់​យ៉ាងខ្លាំង។ ដោយសារតែ​ស្ថានភាព​ភូមិសាស្ត្រ​បច្ចុប្បន្ន យើង​នឹង​បញ្ឈប់​ការផលិត​ក្នុង​តំបន់​របស់​យើង និង​ការនាំចេញ​ទៅកាន់​ទីផ្សារ​របស់​រុស្ស៊ីរហូតដល់​មានការ​ជូនដំណឹង​បន្ថែម​។ ​ក្រុមហ៊ុន​ផលិត​រថយន្ត​លំដាប់​ពិភពលោក​មួយ​នេះក៏បាន​និយាយ​ផងដែរ​ថា ការផ្អាក​ខ្សែសង្វាក់​ផ្គត់ផ្គង់នានា​ដូចជាការបិទ​រោងចក្រ​ផ្គត់ផ្គង់មួយចំនួន​នៅ​អ៊ុយ​ក្រែ​ន នឹង​ប៉ះពាល់​ដល់​ដំណើរការ​ផលិត​នៅ​រោងចក្រ​មួយចំនួន​។​

​ជាការ​រួមចំណែក​មួយ​ក្រុមហ៊ុន​ផលិត​រថយន្ត​របស់​អាល្លឺម៉ង់ កាលពីពេល​ថ្មីៗ​នេះក្រុមហ៊ុន​ផលិត​រថយន្ត​ទំនើប Ford របស់​សហរដ្ឋអាមេរិក​បាន​ប្រកាស​ថា ​ខ្លួន​កំពុង​ផ្អាក​រាល់​ប្រតិបត្តិការ​របស់​ខ្លួន​នៅ​ក្នុង​ប្រទេស​រុស្ស៊ី ខណៈ​ដែល​ក្រុមហ៊ុន​ផលិត​រថយន្ត​របស់​ស​ហ​រដ្ឋ​អាមេរិកមួយទៀតគឺ General Motors បាន​បញ្ជាក់​ថា ខ្លួន​នឹង​ផ្អាក​រាល់​ការនាំចេញ​ទាំងអស់​ទៅកាន់​ប្រទេស​រុស្ស៊ី៕

អត្ថបទ៖ សុខមាន