អនុប្រធានាធិបតី លោកស្រី Delcy Rodriguez បាននិយាយថា ប្រទេសវ៉េណេស៊ុយអេឡា បានឈានដល់គោលដៅរបស់ខ្លួន ក្នុងការផលិតប្រេងឆៅចំនួន ១,២លានបារ៉ែល ក្នុងមួយថ្ងៃ នៅឆ្នាំនេះ បើទោះបីជាមានសម្ពាធរបស់សហរដ្ឋអាមេរិកកាន់តែខ្លាំង និងការរឹបអូសនាវាដឹកប្រេងក៏ដោយ។

លោកស្រីបានឲ្យដឹងនៅលើកម្មវិធីផ្ញើសារ Telegram កាលពីចុងសប្ដាហ៍កន្លងទៅថា កម្មករនៅក្រុមហ៊ុនប្រេងរដ្ឋ PDVSA បានសម្រេចគោលដៅក្រោមផែនការឯករាជ្យផលិតភាព ហើយកំពុងរៀបចំបង្កើនផលិតកម្ម និងបំពេញតាមគោលដៅឆ្នាំ២០២៦។

លោកស្រី Rodriguez បានពណ៌នាសមិទ្ធិផលនេះថា ជាអំណោយថ្ងៃបុណ្យណូអែលដ៏ល្អបំផុត សម្រាប់ប្រជាជនវ៉េណេស៊ុយអេឡា ដោយចាត់ទុកវាថា ជាលទ្ធផលនៃកិច្ចប្រឹងប្រែងរបស់កម្មករប្រេង ដែលប្រឈម និងយកឈ្នះលើ «ការយាយីរុកកួន អរិភាព និងភាពខុសច្បាប់របស់ចក្រពត្តិនិយម ដែលវាយប្រហារ និងរំលោភសិទ្ធិមនុស្សរបស់ប្រជាជនវ៉េណេស៊ុយអេឡា»។

អមដោយការសន្យាបន្តគាំទ្រលោកប្រធានាធិបតី Nicolas Maduro លោកស្រីបានបន្ថែមថា៖ «គ្មានអ្វី និងគ្មាននរណា អាចមកបញ្ឈប់យើងបានឡើយ»។

ការប្រកាសនេះបានកើតឡើងខណៈពេលដែលកងកម្លាំងអាមេរិក បានរឹបអូសនាវាដឹកប្រេងដែលមានទំនាក់ទំនងជាមួយវ៉េណេស៊ុយអេឡា ក្នុងនោះរួមទាំងនាវាមានទង់ជាតិប៉ាណាម៉ា Centuries កាលពីថ្ងៃសៅរ៍ និង Skipper កាលពីថ្ងៃទី១០ ខែធ្នូ ដោយមានរបាយការណ៍បង្ហាញថា ការរឹបអូសទី៣ កំពុងដំណើរការ។

ប្រធានាធិបតីអាមេរិក លោក Donald Trump បានប្រកាស «បិទខ្ទប់ទាំងស្រុង» ចំពោះនាវាដឹកប្រេងជាប់ទណ្ឌកម្ម ដែលចេញពី ឬចូលវ៉េណេស៊ុយអេឡា ដោយហៅរដ្ឋាភិបាលរបស់លោក Maduro ជា «អង្គការភេរវករបរទេស»៕