អ៊ីស្រាអែល បានវាយប្រហារទីក្រុងនានានៅក្នុងតំបន់កាន់កាប់វ៉េសប៊ែង និងបានកម្ទេចអគារលំនៅដ្ឋានរបស់អ្នកស្រុក ។

ទាហានបានបាញ់គ្រាប់បែកភ្លើង និងឧស្ម័នបង្ហូរទឹកភ្នែកនៅថ្ងៃចន្ទនេះ ពេលដែលពួកគេកម្ទេចអគារនៅតំបន់ហ្សេរុយសាឡឹមខាងកើត ។ ក្រុមមន្រ្តីប៉ាឡេស្ទីន បានចោទប្រកាន់អ៊ីស្រាអែលថា បើកយុទ្ធនាការបំលាស់ទីលំនៅក្នុងទីក្រុង ដោយពួកគេនិយាយថា ប្រតិបត្តិការនេះ គឺជាផ្នែកមួយនៃការប៉ុនប៉ងជាប្រព័ន្ធ ក្នុងការបោសសម្អាតជនប៉ាឡេស្ទីនចេញពីដីរបស់ពួកគេ ។

ជនប៉ាឡេស្ទីនរាប់សិបនាក់ ត្រូវបានជម្លៀសចេញ ពេលដែលគ្រឿងចក្រអ៊ីស្រាអែល កម្ទេចអគារលំនៅឋានកម្ពស់ ៤ជាន់ ។ ក្រុមសកម្មជនបានចាត់ទុកថា ជាការកម្ទេចទ្រង់ទ្រាយធំបំផុតនៅតំបន់នោះ ក្នុងឆ្នាំនេះ ។

អ្នកឆ្លើយឆ្លងព័ត៌មានរបស់កាសែត Al Jazeera រាយការណ៍ថា គ្រឿងចក្រ ៣គ្រឿង បានបំផ្លាញអគារផ្ទះល្វែង ១៣ខ្នង នៅសង្កាត់ Wadi Qaddum ភាគខាងត្បូងទីក្រុងចាស់ ស្ថិតក្នុងទីក្រុងហ្សេរុយសាឡឹម ។

កងកម្លាំងអ៊ីស្រាអែល បានបិទផ្លូវ ដាក់ពង្រាយកងកម្លាំង និងដាក់ឲ្យឈរជើងកងកម្លាំងសន្តិសុខនៅលើដំបូងផ្ទះក្បែរគ្នា។ អំឡុងប្រតិបត្តិការនោះដែរ យុវជនម្នាក់ និងបុរសម្នាក់ ត្រូវបានចាប់ខ្លួន ៕