កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ពីរនាក់នៅក្នុងតំបន់ហ្កាហ្សា ស្ទ្រីប ខណៈអ៊ីស្រាអែលបន្តរំលោភកិច្ចព្រមព្រៀងឈប់បាញ់ និងរារាំងជំនួយមនុស្សធម៌ដែលត្រូវការជាចាំបាច់ទៅកាន់តំបន់រងការឡោមព័ទ្ធឆ្នេរសមុទ្រ ដែលរងការបំផ្លិចបំផ្លាញដោយសង្គ្រាមមួយនេះ។

ទីភ្នាក់ងារសារព័ត៌មានប៉ាឡេស្ទីន Wafa បានរាយការណ៍កាលពីថ្ងៃចន្ទ ២២ធ្នូសប្ដាហ៍នេះថា មនុស្សពីរនាក់ត្រូវបានសម្លាប់ បន្ទាប់ពីកងទ័ពអ៊ីស្រាអែល បានបើកការបាញ់ប្រហារក្នុងសង្កាត់ Shujayea នៃភាគខាងកើតទីក្រុងហ្កាហ្សា។  

ការស្លាប់របស់ពួកគេបានធ្វើឱ្យចំនួនសរុបនៃជនជាតិប៉ាឡេស្ទីនដែលត្រូវបានរាយការណ៍ថាត្រូវបានសម្លាប់នៅក្នុងតំបន់ហ្កាហ្សា ក្នុងរយៈពេល២៤ ម៉ោងកន្លងមកនេះ កើនឡើងដល់១២នាក់ រួមទាំងសាកសពចំនួនប្រាំបីនាក់ ដែលត្រូវបានរកឃើញពីគំនរបាក់បែកនៅក្នុងដែនដីនេះ។

ការវាយប្រហារនៅទីក្រុងហ្កាហ្សាពេលនេះ គឺជាការវាយប្រហារចុងក្រោយបំផុតក្នុងចំណោមការរំលោភបំពានរាប់រយលើករបស់អ៊ីស្រាអែលលើបទឈប់បាញ់សម្របសម្រួលដោយសហរដ្ឋអាមេរិករវាងអ៊ីស្រាអែល និងហាម៉ាស ដែលបានចូលជាធរមានកាលពីថ្ងៃទី១០ ខែតុលា។

ការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សាកាលពីថ្ងៃចន្ទ បានថ្កោលទោសការរំលោភបំពានយ៉ាងធ្ងន់ធ្ងរ និងជាប្រព័ន្ធ របស់អ៊ីស្រាអែលលើបទឈប់បាញ់ ដោយកត់សម្គាល់ថាក្រុមអាជ្ញាធរអ៊ីស្រាអែលបានរំលោភលើបទឈប់បាញ់ចំនួន ៨៧៥លើក ចាប់តាំងពីបានចូលជាធរមាន៕