គណៈរដ្ឋមន្ត្រីអ៊ីស្រាអែលកាលពីថ្ងៃចន្ទ ទី២២ ខែធ្នូ បានអនុម័តផែនការបិទវិទ្យុកងទ័ព ដែលជាប្រព័ន្ធផ្សព្វផ្សាយជាតិដ៏ពេញនិយម ជាចំណាត់ការមួយដែលក្រុមអ្នករិះគន់និយាយថាជាផ្នែកមួយនៃយុទ្ធនាការកាន់តែទូលំទូលាយដោយក្រុមចម្រុះស្តាំនិយមជ្រុលរបស់លោកនាយករដ្ឋមន្ត្រី Benjamin Netanyahu ដើម្បីទប់ស្កាត់ប្រព័ន្ធផ្សព្វផ្សាយឯករាជ្យ។

រដ្ឋមន្ត្រីក្រសួងការពារជាតិ លោក Israel Katz បាននិយាយថាវិទ្យុកងទ័ព ដែលបានចាក់ផ្សាយជាច្រើនឆ្នាំរបស់អ៊ីស្រាអែល នឹងត្រូវបិទនៅត្រឹមថ្ងៃទី១ ខែមីនា ឆ្នាំ២០២៦។ លោក Katz និយាយថា បេសកកម្មដំបូងរបស់ស្ថានីយ៍នេះគឺដើម្បីបម្រើឲ្យផ្នែកកងទ័ព។ វិទ្យុកងទ័ព គឺជាស្ថាប័នព័ត៌មានមួយក្នុងចំណោមស្ថាប័នព័ត៌មានចំនួនពីរដែលទទួលបានមូលនិធិពីរដ្ឋនៅក្នុងប្រទេសអ៊ីស្រាអែល រួមជាមួយស្ថាប័នផ្សព្វផ្សាយរដ្ឋ KAN។ ទាំងពីរនេះសុទ្ធតែមានឯករាជ្យខាងវិចារណកថា និងមានអ្នកគាំទ្រស៊ីវិលច្រើន។

លោក Katz និយាយថា ស្ថានីយ៍វិទ្យុគ្រប់គ្រងដោយកងទ័ព ដែលចាក់ផ្សាយដល់សាធារណជនទូទៅ គឺជាភាពមិនប្រក្រតីនៅក្នុងរដ្ឋលទ្ធិប្រជាធិបតេយ្យ។ លោក Netanyahu បានគាំទ្រអំណះអំណាងនោះក្នុងអំឡុងកិច្ចប្រជុំគណៈរដ្ឋមន្ត្រី ដោយនិយាយថា ការរៀបចំបែបនេះមាននៅក្នុង «ប្រទេសកូរ៉េខាងជើង និងប្រហែលជាមាននៅប្រទេសមួយចំនួនទៀត» ហើយអ៊ីស្រាអែលនឹងមិនត្រូវបានរាប់បញ្ចូលក្នុងចំណោមពួកគេឡើយ។

ចំណាត់ការនេះបានធ្វើឲ្យមានប្រតិកម្មភ្លាមៗពីអ្នកសារព័ត៌មាន ក្រុមសង្គមស៊ីវិល និងឥស្សរជនប្រឆាំង ដែលបានព្រមានថា វានឹងធ្វើឱ្យប៉ះពាល់ដល់សេរីភាពសារព័ត៌មាន។