ប្រធានាធិបតីអាមេរិក លោក Donald Trump បានបញ្ជាក់ឡើងវិញជាថ្មីក្នុងសន្និសីទព័ត៌មានកាលពីថ្ងៃចន្ទ (២២ ធ្នូ) ថា សហរដ្ឋអាមេរិក ត្រូវការកោះហ្គ្រីនលែន (Greenland) សម្រាប់សន្តិសុខជាតិរបស់ខ្លួន ហើយបាននិយាយថា ប្រេសិតពិសេសមួយរូបដែលលោកបានតែងតាំងប្រចាំដែនដីនេះ នឹង «ដឹកនាំការទទួលបន្ទុក» លើបញ្ហានេះ។

គួរឱ្យដឹងថា លោក Trump បានតែងតាំងអភិបាលរដ្ឋ Louisiana គឺលោក Jeff Landry កាលពីថ្ងៃអាទិត្យកន្លងទៅ ជាបេសកជនពិសេសរបស់លោក ប្រចាំនៅដែនដីហ្រ្គីនលែន ដោយទាញការរិះគន់ជាថ្មីពីប្រទេសដាណឺម៉ាក និងដែនដី ហ្រ្គីនលែន ផ្ទាល់ ជុំវិញចំណាប់អារម្មណ៍របស់ទីក្រុងវ៉ាស៊ីនតោន ចំពោះកោះអាកទិកដែលសម្បូរទៅដោយធនធានរ៉ែមួយនេះ។

លោក Trump បានលើកពីគំនិតធ្វើឱ្យកោះ Greenland ដែលជាទឹកដីស្វ័យគ្រប់គ្រងរបស់ដាណឺម៉ាក ក្លាយជាផ្នែកមួយនៃសហរដ្ឋអាមេរិក ដោយលើកឡើងពីសារៈសំខាន់ជាយុទ្ធសាស្ត្រ និងធនធានរ៉ែរបស់កោះនេះ។ ថ្លែងប្រាប់អ្នកសារព័ត៌មានថា ប្រធានាធិបតីរូបនេះលើកឡើងថា៖ អាមេរិកត្រូវការហ្រ្គីនលែន សម្រាប់សន្តិសុខជាតិ មិនមែនដោយសាររ៉ែទេ។ លោកបន្តថា "បើមើលទៅឆ្នេរហ្រ្គីនលែន នោះនឹងឃើញសុទ្ធតែនាវារុស្ស៊ី និងចិន ហើយអាមេរិក ត្រូវការកោះនេះដើម្បីសន្តិសុខជាតិ"។

ហ្គ្រីនលែន ជាអតីតដែនដីអាណានិគមរបស់ដាណឺម៉ាក ដែលមានប្រជាជនប្រហែល ៥៧.០០០នាក់ ហើយកោះនេះមានសិទ្ធិប្រកាសឯករាជ្យក្រោមកិច្ចព្រមព្រៀងឆ្នាំ២០០៩ ប៉ុន្តែនៅតែពឹងផ្អែកយ៉ាងខ្លាំងទៅលើការនេសាទ និងការឧបត្ថម្ភធនរបស់ដាណឺម៉ាក។ ទីតាំងយុទ្ធសាស្ត្ររបស់ហ្រ្គីនលែន រវាងអឺរ៉ុប និងអាមេរិកខាងជើង ធ្វើឱ្យកោះនេះក្លាយជាទីតាំងដ៏សំខាន់សម្រាប់ប្រព័ន្ធការពារមីស៊ីលបាលីស្ទិករបស់សហរដ្ឋអាមេរិក៕