លោក ម៉ាខ្មូដ អាបាស (Mahmoud Abbas) បានបញ្ជាក់កាលពីថ្ងៃចន្ទថា អាជ្ញាធរប៉ាឡេស្ទីនបានត្រៀមខ្លួនរួចជាស្រេច ដើម្បីធ្វើការជាមួយប្រធានាធិបតីអាមេរិកលោក ដូណាល់ ត្រាំ (Donald Trump) ដើម្បីសម្រេចបាននូវសន្តិភាពដ៏ទូលំទូលាយ និងយុត្តិធម៌ ស្របតាមសេចក្តីសម្រេចរបស់អន្តរជាតិ និងគំនិតផ្តួចផ្តើមសន្តិភាពអារ៉ាប់។

លោក អាបាស បានសង្កត់ធ្ងន់លើតម្រូវការបន្ទាន់ ក្នុងការអនុវត្តផែនការរបស់លោក ត្រាំ និងសេចក្តីសម្រេចលេខ ២៨០៣ របស់ក្រុមប្រឹក្សាសន្តិសុខអង្គការសហប្រជាជាតិលេខ ដោយអនុវត្តបទឈប់បាញ់នៅតំបន់ហ្កាហ្សា សម្របសម្រួលជំនួយមនុស្សធម៌ ទប់ស្កាត់ការផ្លាស់ទីលំនៅ ធានាការដកកងកម្លាំងអ៊ីស្រាអែល និងអនុញ្ញាតឲ្យរដ្ឋបាលប៉ាឡេស្ទីនទទួលខុសត្រូវរបស់ខ្លួន ខណៈពេលដែលពន្លឿនកិច្ចខិតខំប្រឹងប្រែងកសាងឡើងវិញ។

លោកប្រធានអាជ្ញាធរនេះ បានបញ្ជាក់ពីតម្រូវការក្នុងការដាក់សម្ពាធលើរដ្ឋាភិបាលអ៊ីស្រាអែលឲ្យបញ្ឈប់សកម្មភាពដែលធ្វើឲ្យប៉ះពាល់ដល់ស្ថាប័នប៉ាឡេស្ទីន រំលោភលើកន្លែងពិសិដ្ឋរបស់គ្រិស្តសាសនា និងសាសនាអ៊ីស្លាម និងគំរាមកំហែងដល់ដំណោះស្រាយរដ្ឋពីរតាមរយៈការពង្រីកការតាំងទីលំនៅ ខណៈពេលដែលលោកក៏បានគូសបញ្ជាក់ពីសារៈសំខាន់នៃការបញ្ចេញចំណូលពន្ធប៉ាឡេស្ទីនដែលត្រូវបាន   កាត់ទុក។

លោកបានធ្វើការអត្ថាធិប្បាយនេះក្នុងអំឡុងពេលសន្និសីទសារព័ត៌មានរួមគ្នា ជាមួយនាយករដ្ឋមន្ត្រីក្រិក លោក Kyriakos Mitsotakis នៅទីក្រុងរ៉ាម៉ាឡា (Ramallah) កាលពីថ្ងៃចន្ទ។

ដោយមានការគាំទ្រពីសហភាពអឺរ៉ុប លោកបានសង្កត់ធ្ងន់លើតួនាទីដ៏សំខាន់ដែលប្រទេសក្រិកអាចមានក្នុងការលើកកម្ពស់សន្តិភាព និងស្ថិរភាពនៅក្នុងតំបន់ និងលើសពីនេះ។ នេះបើយោងតាមទីភ្នាក់ងារសារព័ត៌មាន Wafa៕