សារព័ត៌មាន Yonhap បានដកស្រង់សម្តីរបស់កងទ័ពជើងទឹកកូរ៉េខាងត្បូងដែលបាននិយាយថា នាវាមុជទឹកដើរដោយថាមពលនុយក្លេអ៊ែររបស់កងទ័ពជើងទឹកសហរដ្ឋអាមេរិកមួយគ្រឿង បានមកដល់មូលដ្ឋានប្រតិបត្តិការកងទ័ពជើងទឹកមួយ ក្នុងទីក្រុងប៊ូសាន (Busan) នៅថ្ងៃអង្គារនេះ។  

នាវាមុជទឹក USS Greeneville ដែលជានាវាមុជទឹកវាយប្រហារ Los Angeles-class បានចូលកំពង់ផែដើម្បីបំពេញបន្ថែមសម្ភារៈផ្គត់ផ្គង់ និងផ្តល់ការសម្រាកដល់ក្រុមនាវិក។

នេះគឺជាដំណើរទស្សនកិច្ចលើកដំបូងរបស់នាវាមុជទឹកដើរដោយថាមពលនុយក្លេអ៊ែរ ក្រោមការដឹកនាំរបស់លោកប្រធានាធិបតី Lee Jae-myung ដែលបានឈ្នះការបោះឆ្នោតកាលពីខែមិថុនា។ កាលពីលើកមុន នាវាមុជទឹកដើរដោយថាមពលនុយក្លេអ៊ែររបស់សហរដ្ឋអាមេរិក បានទៅទស្សនកិច្ចកំពង់ផែកូរ៉េខាងត្បូងកាលពីខែកុម្ភៈ នៅពេលដែលនាវាមុជទឹក USS Alexandria បានចូលចតនៅមូលដ្ឋានកងទ័ពជើងទឹកដដែលនេះ។

នាវាមុជទឹក USS Greeneville បានទៅទស្សនកិច្ចកូរ៉េខាងត្បូងចំនួន បីដង រួចហើយ ដោយបានចូលចតកំពង់ផែនេះ ក្នុងឆ្នាំ ២០១៦។

កូរ៉េខាងជើងបានរិះគន់នាវាមុជទឹកដើរដោយថាមពលនុយក្លេអ៊ែររបស់សហរដ្ឋអាមេរិក ដែលបានទៅទស្សនកិច្ចកំពង់ផែកូរ៉េខាងត្បូងនេះ៕