រណ្តៅស្រុតដីរាប់រយកន្លែង បានកើតមាននៅតំបន់កសិកម្មស្ថិតនៅភាគកណ្តាលប្រទេសទួរគី បង្កឡើងដោយសារភ្លៀងធ្លាក់ខ្លាំង និងស្រកទឹកក្រោមដី បណ្តាលឲ្យកើតមានក្តីបារម្ភនៅក្នុងចំណោមប្រជាកសិករ និងក្រុមអ្នកជំនាញបរិស្ថាន ដែលយល់ឃើញថា វាគឺជាសញ្ញាដ៏គួរឲ្យបារម្ភមួយនៃបម្រែបម្រួលអាកាសធាតុ ។

រណ្តៅស្រុតដី បានវាយប្រហារដីកសិកម្មផលិតពោត ស្រូវសាលី និងឆៃថាវ នៅស្រុក Karapinar ស្ថិតក្នុងខេត្ត Konya ដោយមានរណ្តៅជាង ១០កន្លែងចូលទៅក្នុងចម្ការ នៅតាមទីកន្លែងមួយចំនួន ។ នៅតាមតំបន់ភ្នំ រណ្តៅស្រុតដីដែលធ្លាប់មានទឹក ឥឡូវប្រែជារីងហួតស្ងួតអស់ ។

រណ្តៅស្រុតដីកើតមាននៅខេត្ត Konya មានចំនួនកើនឡើងក្នុងរយៈពេលជាច្រើនឆ្នាំកន្លងមកនេះ ក្នុងនោះរណ្តៅបច្វុប្បន្នមានជិតដល់ ៧០០កន្លែង ។ នេះបើយោងតាមការអះអាងរបស់លោក Fetullah Arik គឺជាសាស្រ្តាចារ្យភូគព្ភសាស្ត្រសិក្សាពីរណ្តៅស្រុតដី នៅសាកលវិទ្យាល័យបច្ចេកវិទ្យាខេត្ត Konya ។

 លោក Arik និយាយថា ហេតុផលសំខាន់នៃចំនួនកើនឡើងរណ្តៅស្រុតដីនេះ បណ្តាលមកពីបម្រែបម្រួលអាកាសធាតុ និងគ្រោះរាំងស្ងួត ដែលធ្វើឲ្យប៉ះពាល់ដល់ពិភពលោកទាំងមូល ចាប់តាំងពីទសវត្សរ៍ឆ្នាំ ២០០០មកម្ល៉េះ ។

 គ្រោះរាំងស្ងួត និងស្រកទឹកក្រោមដី នាំឲ្យកសិករក្នុងស្រុក ជីកអណ្តូងកាន់តែច្រើន ដោយគ្មានអាជ្ញាបណ្ណត្រឹមត្រូវ ធ្វើឲ្យទឹកក្រោមដីកាន់តែរីងស្ងួត ហើយនិងបង្កបញ្ហាកាន់តែច្រើន ៕