អាជ្ញាធរកោះតៃវ៉ាន់បានឲ្យដឹងថា ស្ត្រីជនជាតិថៃម្នាក់ដែលត្រូវបានសង្ស័យថា បានបង្ខិតបង្ខំកូនស្រីវ័យជំទង់របស់ខ្លួនឲ្យប្រកបរបរផ្លូវភេទ ដែលជាករណីដ៏ល្បីល្បាញមួយនៅទីក្រុងតូក្យូ ប្រទេសជប៉ុន ត្រូវបាននិរទេសពីកោះតៃវ៉ាន់ កាលពីថ្ងៃចន្ទ (ទី២២ ខែធ្នូ) ដោយសារបទល្មើសទាក់ទងនឹងពេស្យាចារ និងបំពានច្បាប់អន្តោប្រវេសន៍។

ទីភ្នាក់ងារអន្តោប្រវេសន៍បានឲ្យដឹងថា ស្ត្រីរូបនោះបានចូលទៅកាន់កោះតៃវ៉ាន់ ដោយចាកចេញពីប្រទេសថៃ ក្រោមកម្មវិធីគ្មានទិដ្ឋាការ ហើយត្រូវបានគេរកឃើញថា បានបំពានច្បាប់គ្រប់គ្រងពេស្យាចារ និងស្នាក់នៅហួសរយៈពេលអនុញ្ញាត។ នគរបាលបានឃាត់ខ្លួន និងបញ្ជូនស្ត្រីនោះទៅមន្ទីរឃុំឃាំងអន្តោប្រវេសន៍។

នគរបាលបានប្រាប់ឲ្យដឹងថា នៅក្នុងការស៊ើបអង្កេតរបស់ជប៉ុន ក្មេងស្រីដែលពេលនោះមានអាយុ ១២ឆ្នាំ បានទៅប្រទេសជប៉ុនជាមួយម្តាយរបស់ខ្លួន កាលពីចុងខែមិថុនា ហើយត្រូវបានគេជឿថា ត្រូវបានទុកចោលឲ្យនៅម្នាក់ឯង ដើម្បីប្រកបរបរបម្រើផ្លូវភេទ នៅឯហាងម៉ាស្សាមួយកន្លែង ក្នុងសង្កាត់ Yushima របស់ទីក្រុងតូក្យូ។

នគរបាលបានបន្ថែមថា បន្ទាប់មក រូបនាងត្រូវបានបង្ខំឲ្យទៅធ្វើការនៅហាងមួយផ្សេងទៀត បន្ទាប់ពីចាកចេញពីហាងទី១ មុនពេលទាក់ទងជាមួយភ្នាក់ងារសេវាកម្មអន្តោប្រវេសន៍ ដើម្បីសុំការជួយសង្គ្រោះ ក្នុងខែកញ្ញា៕