លំហូរមនុស្សជម្លៀសខ្លួនរត់គេចចេញពីការប្រយុទ្ធគ្នានៅស៊ូដង់ ពុំបានបង្ហាញពីសញ្ញានៃការយឺតយ៉ាវនោះទេ ពិសេសជនស៊ីវិលភៀសខ្លួនចេញពីទីក្រុង Heglig ។

កាលពីដើមខែធ្នូនេះ កងកម្លាំងគាំទ្ររហ័ស(RSF)ដណ្តើមគ្រប់គ្រងតំបន់ប្រេងយុទ្ធសាស្រ្ត Heglig ស្ថិតក្នុងខេត្ត West Kordofan ក្រោយគូប្រជែងរបស់ខ្លួនដែលជាកងកម្លាំងប្រដាប់អាវុធស៊ូដង់ ដកទ័ពចេញពីទីនោះ ។

មនុស្សជម្លៀសខ្លួនជិត ១,៧០០នាក់ ដែលភាគច្រើនជាកុមារ និងស្រ្តី បានរត់គេចចេញពីការប្រយុទ្ធគ្នានៅតំបន់ភាគខាងត្បូង ហើយនិងខ្វះខាតតម្រូវការចាំបាច់ជាមូលដ្ឋានធ្ងន់ធ្ងរ ។

ពួកគេមួយចំនួនមានសំណាងបានឡើងជិះរថយន្ត ពេលដែលពួកគេរត់គេចចេញពីទីក្រុងរបស់ពួកគេ និងភូមិដ្ឋានរបស់ពួកគេ ។ ក្រោយធ្វើដំណើរដ៏ហត់នឿយ មនុស្សជម្លៀសខ្លួនទាំងនេះ មកដល់ផ្ទះថ្មីរបស់ពួកគេ នៅជំរំជម្លៀសខ្លួន Gos Alsalam ស្ថិតក្នុងទីក្រង Kosti ដែលជារដ្ឋធានីរបស់ខេត្ត White Nile ។

ស្រ្តីវ័យចំណាស់ម្នាក់ ក្នុងស្ថានភាពអស់កម្លាំង និងខ្សោយខ្លាំង និយាយថា ពួកយើងចាកចេញដោយគ្មានអ្វីទាំងអស់ ពួកយើងយកមកតាមខ្លួននូវសម្លៀកបំពាក់ប៉ុន្មានកំផ្លេប៉ុណ្ណោះ ។

នៅក្នុងជំរំ មនុស្សដែលបានមកដល់ប្រឈមស្ថានភាពមនុស្សធម៌ធ្ងន់ធ្ងរខ្លាំងណាស់ ។ សំពត់តង់រហែក ប៉ុន្តែមនុស្សជម្លៀសខ្លួនចេះតែមកដល់កាន់តែច្រើន ធ្វើឲ្យជំនួយមនុស្សធម៌កាន់តែខ្សត់ខ្សោយ ។ ការគាំទ្រផ្នែកមនុស្សធម៌មិនគ្រប់គ្រាន់នោះទេ ធ្វើឲ្យការឈឺចាប់របស់ពួកគេ គ្មានឡើយពាក្យថាទីបញ្ចប់ ៕