ពេលដែលកាតាជួយធានាកិច្ចព្រមព្រៀងសន្តិភាព ដើម្បីបញ្ចប់ជម្លោះកំពុងបន្តរវាងក្រុមឧទ្ទាម M23 និងកងកម្លាំងរដ្ឋាភិបាលកុងហ្គោ កាលពីខែមុន មាននូវសង្ឃឹមនៅក្នុងចំណោមពលរដ្ឋកុងហ្គោថា បទឈប់បាញ់អចិន្រ្តៃយ៍នឹងលេចចេញជារូបរាងឡើងនៅក្នុងពេលដ៏ខ្លីខាងមុខនេះ ដើម្បីបញ្ចប់ជម្លោះ ដែលបានធ្វើពលរដ្ឋជិត ១លាននាក់ នៅភាគខាងកើតប្រទេស រត់ភៀសខ្លួន ។

ចាប់តាំងពីចុងឆ្នាំ ២០២១រហូតមក ក្រុមមួយនេះ ដែលសហរដ្ឋអាមេរិក និងអង្គការសហប្រជាជាតិ និយាយថា ត្រូវបានគាំទ្រដោយប្រទេសរ៉្វាន់ដា បានប៉ះទង្គិចគ្នាជាមួយកងទ័ពកុងហ្គោ នៅក្នុងការប្រយុទ្ធគ្នាដ៏ធ្ងន់ធ្ងរមួយដែលបានសម្លាប់មនុស្សយ៉ាងហោច ៧ពាន់នាក់ ក្នុងឆ្នាំ ២០២៥នេះ ។

ការប៉ុនប៉ងដោះស្រាយជម្លោះក្នុងតំបន់ បានបរាជ័យ ។ ពេលដែលក្រុមតំណាងឧទ្ទាម M23 និងក្រុមមន្រ្តីរដ្ឋាភិបាលកុងហ្គោ បានជួបគ្នាសម្រាប់កិច្ចចរចានៅទីក្រុងដូហា ប្រទេសកាតា ហើយនិងបន្តចុះហត្ថលេខាលើកិច្ចព្រមព្រៀងកាលពីខែវិច្ឆិកា ពលរដ្ឋកុងហ្គោហាក់មានក្តីសង្ឃឹមជាខ្លាំង ។ 

ដូច្នេះហើយ ពេលដែលក្រុមឧទ្ទាម M23បើកការវាយប្រហារមួយទៀត និងដណ្តើមគ្រប់គ្រងបានបណ្តោះអាសន្នទីក្រុងយុទ្ធសាស្រ្តUvira ក្នុងខែនេះ ក្តីសង្ឃឹមថានឹងមានសន្តិភាពយូរអង្វែង ប្រែជាបាត់ទៅវិញ ស្របពេលដែលពលរដ្ឋខ្លះ ជឿជាក់ថា កិច្ចប្រជុំទាំងនេះ គ្រាន់តែជាឆាកល្ខោននយោបាយប៉ុណ្ណោះ ។

លោក Hubert Masomera គឹជាមេធាវី និងជាអ្នកវិភាគនយោបាយកុងហ្គោមួយរូប និយាយប្រាប់កាសែត Al Jazeera នៅទីក្រុងភាគខាងកើត Goma ថា វាច្បាស់ណាស់ថា ពួកគេពុំមានឆន្ទៈចង់បញ្ចប់ជម្លោះមួយនេះឡើយ ។

លោកបន្តថា មនុស្សនៅទីនេះ មានអារម្មណ៍ថា ត្រូវបានគេបោះបង់ចោល ។ ការព្រួយថា ជម្លោះមិនត្រឹមតែបន្តទេ តែវាកាន់តែលិចលង់ជ្រៅឡើងថែមមួយកម្រិតទៀតនោះ បានក្លាយជាទស្សនីយភាពដ៏រសើបមួយនៅកុងហ្គោ ជាទីដែលសង្រ្គាមស៊ីវិល ២លើកកាលពីមុន បង្កឡើងដោយប្រទេសជិតខាងខ្លួន ៕