អគារផ្ទះរបស់គ្រួសារលោក Halawa នៅឈរកម្ពស់ ២ជាន់ពីលើគំនរបាក់បែក ក្នុងទីក្រុងហ្កាហ្សា គឺជាការរស់រានដ៏កម្រមួយ ក្រោយការវាយប្រហារតាមច្រកអាកាសឥតឈប់ឈររបស់អ៊ីស្រាអែលក្នុងរយៈពេល ២ឆ្នាំកន្លមកនេះ បានធ្វើឲ្យអគាររាបដល់ដី នៅទូទាំងតំបន់ហ្កាហ្សា ។

ផ្នែកមួយនៃអគា បានបាក់រលំ ដោយចម្រឹងដែកកោងលយចេញពីកន្លែងដែលធ្លាប់មានដំបូល ។ គ្រួសារមួយនេះ បានធ្វើជណ្តើរឈើមួយ ដើម្បីអាចឡើងទៅដល់អគារផ្ទះរបស់ពួកគេ ទោះបីជាជណ្តើរបណ្តោះអាសន្នទាំងនេះ ប្រឈមនឹងការបាក់ធ្លាក់ចុះក្រោមគ្រប់ពេលក៏ដោយ ។

សង្រ្គាមប្រល័យពូជសាសន៍របស់អ៊ីស្រាអែលបានសម្លាប់ជនប៉ាឡេស្ទីនជាង ៧ម៉ឺននាក់ ដោយបំផ្លិចបំផ្លាញ ឬធ្វើឲ្យខូចខាតអគារជាង ៧០ភាគរយ ធ្វើឲ្យមនុស្សស្ទើតែទាំងអស់ក្នុងចំណោមពលរដ្ឋ ២,៣លាននាក់ ក្នុងដែនដីបិទច្រកប៉ាឡេស្ទីនមួយនេះ ត្រូវជម្លៀសខ្លួន ។

កាលពីខែតុលាកន្លងទៅ អ៊ីស្រាអែលបានឈានដល់កិច្ចព្រមព្រៀងបទឈប់បាញ់ ប៉ុន្តែការវាយប្រហាររបស់ពួកគេ ពុំបានឈប់នោះទេ ។ ពួកគេបានសម្លាប់ជនប៉ាឡេស្ទីនជាង ៤០០នាក់ ចាប់តាំងពីពេលនោះមក ជាការបំពានបទឈប់បាញ់ ។ ពួកគេពុំអនុញ្ញាតឲ្យជំនួយចូលពេញលេញផងដែរ ។

ការសាងសង់តំបន់ហ្កាហ្សាឡើងវិញ ពុំទាន់ចាប់ផ្តើមនោះទេ ហើយត្រូវបានគេព្យាករថានឹងចំណាយពេលរាប់ឆ្នាំ ខណៈអ៊ីស្រាអែលបន្តគ្រង់គ្រងទាំងស្រុងច្រកចេញ-ចូលដែនដីហ្កាហ្សា ។ នេះមានន័យថា គ្រួសារជាច្រើនដូចជាគ្រួសារលោក Halawas ពិបាកកសាងជីវិតរបស់ពួកគេឡើងវិញខ្លាំងណាស់ ។

គ្រួសាររបស់លោក Halawas បានបោះបង់ផ្ទះរបស់ពួកគេ អស់រយៈពេល ៣ខែ ក្រោយសង្រ្គាមចាប់ផ្តើមកាលពីថ្ងៃទី ៧ ខែតុលា ឆ្នាំ ២០២៣ ។ ពួកគេបានវិលត្រឡប់មកវិញ អំឡុងភាពស្ងប់ស្ងាត់ដ៏ផុយស្រួយបង្កើតឡើងដោយបទឈប់បាញ់ ។ ដូចគ្នានឹងគ្រួសារដទៃទៀតដែរ វាគឺជាជម្រើសល្អប្រសើរក្នុងការមករស់នៅក្នុងអគារបាក់បែកផ្ទះរបស់ខ្លួន ជាជាងរស់នៅក្នុងសំពត់តង់ ជាពិសេសនៅពេលភ្លៀងធ្លាក់ជន់លិចសំពត់តង់ ក្នុងរយៈពេលប៉ុន្មានសប្តាហ៍កន្លងមកនេះ ៕