យន្តហោះឯកជនមួយគ្រឿងដែលដឹកមេបញ្ជាការយោធាលីប៊ី ឈ្មោះលោក Mohammed Ali Ahmed Al-Haddad មន្ត្រីជាន់ខ្ពស់ ៤រូបផ្សេងទៀត និងបុគ្គលិក ៣នាក់ បានជួបគ្រោះថ្នាក់កាលពីថ្ងៃអង្គារ (២៣ ធ្នូ) បន្ទាប់ពីហោះឡើងពីរដ្ឋធានីអង់ការ៉ា ប្រទេសទួរគី ដោយសម្លាប់មនុស្សទាំងអស់លើយន្តហោះ។

នាយករដ្ឋមន្ត្រីលីប៊ី លោក Abdul-Hamid Dbeibah បានបញ្ជាក់ពីការស្លាប់របស់លោកនាយសេនាធិការ Ahmad al-Haddad និងមន្ត្រីទាំង ៤នាក់ ដោយបាននិយាយក្នុងសេចក្តីថ្លែងការណ៍មួយថា “គ្រោះថ្នាក់ដ៏សោកសៅ” បានកើតឡើង នៅពេលគណៈប្រតិភូកំពុងវិលត្រឡប់ទៅផ្ទះវិញ។ លោកបន្តថា មន្រ្តីជាន់ខ្ពស់ ៤រូបទៀតរួមមាន មេបញ្ជាការកងកម្លាំងជើងគោកលីប៊ី នាយកអាជ្ញាធរផលិតកម្មយោធា ទីប្រឹក្សារបស់នាយសេនាធិការរូបនេះ និងអ្នកថតរូបម្នាក់មកពីការិយាល័យនាយសេនាធិការ។

រដ្ឋមន្ត្រីក្រសួងមហាផ្ទៃទួរគី លោក Ali Yerlikaya បាននិយាយថា យន្តហោះនេះបានហោះចេញពីអាកាសយានដ្ឋាន Esenboga នៃទីក្រុងអង់ការ៉ា វេលាម៉ោងក្នុងស្រុក ១៧:១០នាទីល្ងាច ក្នុងដំណើរទៅកាន់ទីក្រុងទ្រីប៉ូលី ហើយក៏បានបាត់ទំនាក់ទំនង ក្រោយមក អាជ្ញាធរបានរកឃើញបំណែកយន្តហោះនៅជិតភូមិ Kesikkavak ក្នុងស្រុក Haymana ក្រុងអង់ការ៉ា។

លោកបានបន្ថែមថា យន្តហោះប្រភេទ Dassault Falcon 50 នេះ បានស្នើចុះចតជាបន្ទាន់ពេលកំពុងហោះហើរពីលើស្រុក Haymana ប៉ុន្តែការទាក់ទងមិនបានជោគជ័យឡើយ ចំណែកមូលហេតុនៃការធ្លាក់យន្តហោះមិនទាន់ច្បាស់ភ្លាមៗទេ។ រដ្ឋមន្ត្រីក្រសួងយុត្តិធម៌ទួរគីបាននិយាយថា ការស៊ើបអង្កេតលើសោកនាដកម្មនេះកំពុងដំណើរការ៕