អាជ្ញាធរចក្រភពអង់គ្លេស កាលពីថ្ងៃអង្គារ (២៣ ធ្នូ) បាននិយាយថា បុរសពីរនាក់ត្រូវរកឃើញថាមានទោស ពីបទរៀបចំផែនការសម្លាប់មនុស្សរាប់រយនាក់ ក្នុងការវាយប្រហារដោយកាំភ្លើង ដែលបំផុសគំនិតដោយក្រុមភេរវករ រដ្ឋអ៊ិស្លាម (IS) ប្រឆាំងនឹងសហគមន៍ជនជាតិជ្វីហ្វ ក្នុងដែនដីអង់គ្លេស។

ក្រុមអ្នកស៊ើបអង្កេតព្រមានថា ផែនការវាយប្រហារនេះបង្ហាញពីហានិភ័យនៃការផ្ទុះឡើងវិញនៃសកម្មភាពបះបោរ ដែលបង្កឡើងដោយក្រុមសកម្មប្រយុទ្ធ។

នគរបាល និងក្រុមព្រះរាជអាជ្ញា បាននិយាយថា បុរសទាំងពីរនោះឈ្មោះ លោក Walid Saadaoui អាយុ ៣៨ឆ្នាំ និងលោក Amar Hussein អាយុ ៥២ឆ្នាំ គឺជាពួកជ្រុលនិយម-អ៊ិស្លាមនិយម ដែលមានបំណងបើកការបាញ់ប្រហារដោយប្រើអាវុធស្វ័យប្រវត្តិ ដើម្បីសម្លាប់ជនជាតិជ្វីហ្វឱ្យបានច្រើនតាមដែលពួកគេអាចធ្វើបាន។

លោក Robert Potts មន្រ្តីនគរបាលទទួលបន្ទុកផ្នែកប្រឆាំងភេរវកម្ម នៅដែនដីអង់គ្លេស បាននិយាយថា ប្រសិនបើផែនការនេះក្លាយជាការពិត នោះនឹងបណ្តាលឱ្យមាន "ការវាយប្រហារភេរវកម្មដ៏បង្ហូរឈាមបំផុតមួយ ឬអាចជាការវាយប្រហារភេរវកម្មដ៏កំណាចបំផុតក្នុងប្រវត្តិសាស្ត្រចក្រភពអង់គ្លេស"។

ការកាត់ទោសនេះកើតឡើងមិនដល់មួយសប្តាហ៍ផង បន្ទាប់ពីការបាញ់ប្រហារដ៏ធំនៅពិធីបុណ្យជនជាតិជ្វីហ្វមួយនៅឆ្នេរទីក្រុងស៊ីដនី នៃប្រទេសអូស្រ្តាលី ដែលបានសម្លាប់មនុស្ស ១៥នាក់។ ក្រុមរដ្ឋអ៊ិស្លាម (IS) បានហៅការវាយប្រហារនៅអូស្ត្រាលីនោះថាជា «ប្រភពនៃមោទនភាព»។ ទោះបីជាក្រុមជីហាដមួយនេះមិនបានអះអាងទទួលខុសត្រូវច្បាស់ៗក៏ដោយ ក៏ការឆ្លើយតបនេះបានបង្កើនការភ័យខ្លាចចំពោះកំណើននៃភាពជ្រុលនិយមដ៏ហិង្សា៕