ភាពតានតឹងបានផ្ទុះឡើងក្នុងរដ្ឋធានីរដ្ឋបាលរបស់ប្រទេសបូលីវី កាលពីថ្ងៃអង្គារ២៣ ធ្នូ ខណៈសមាជិកនៃសហជីពកម្មករបូលីវី (COB) បានប៉ះទង្គិចជាមួយកងកម្លាំងនគរបាលក្នុងអំឡុងពេលដើរក្បួនទាមទារឱ្យលុបចោលក្រឹត្យរបស់រដ្ឋាភិបាលថ្មីៗនេះដែលបានលុបចោលការឧបត្ថម្ភធនប្រេងឥន្ធនៈ និងបង្កឱ្យមានការកើនឡើងយ៉ាងខ្លាំងនៃថ្លៃដឹកជញ្ជូន និងទំនិញជាមូលដ្ឋាន។

កងកម្លាំងសន្តិសុខបានបិទផ្លូវចូលទៅកាន់ Plaza Murillo ដែលជាទីតាំងនៃវិមានប្រធានាធិបតី និងសភា ខណៈក្រុមបាតុកររាប់រយនាក់បានព្យាយាមរុលចូលទៅក្នុងតំបន់ហាមឃាត់។

នគរបាលបានបាញ់ឧស្ម័នបង្ហូរទឹកភ្នែកដើម្បីបំបែកហ្វូងមនុស្ស ដោយរួមមានកម្មកររ៉ែ និងកម្មកររោងចក្រដែលត្រូវបានប្រមូលផ្តុំសម្រាប់ថ្ងៃទីពីរជាប់ៗគ្នា។ ក្រុមបាតុករបានគប់ផាវ និងគ្រឿងផ្ទុះ ពេលពួកគេរុលទៅមុខក្នុងទីក្រុងនេះ ជាការបន្ថែមភាពវឹកវរនៅតាមដងផ្លូវនានា ដែលត្រូវបានរារាំងរួចហើយដោយក្រុមគូប្រជែង។   

ក្រុមអាជ្ញាធរបានរាយការណ៍ថាមានការចាប់ខ្លួនយ៉ាងហោចណាស់ពីរនាក់ និងមន្ត្រីនគរបាលបួននាក់រងរបួស។ ភាពចលាចលបានផ្ទុះឡើង ទោះមានការអញ្ជើញពីរដ្ឋាភិបាលទៅកាន់ក្រុមមេដឹកនាំ COB ដើម្បីបើកការសន្ទនាក៏ដោយ។

បន្ទាប់ពីពិគ្រោះយោបល់ជាមួយសាខាក្នុងតំបន់ លេខាធិការប្រតិបត្តិរបស់សហជីព បានយល់ព្រមចូលរួមការចរចា ប៉ុន្តែបាននិយាយថា ការធ្វើបាតុកម្មនៅជុំវិញអគាររដ្ឋាភិបាលនឹងបន្ត៕