ប្រទេសរុស្ស៊ី និងចិនកាលពីថ្ងៃអង្គារ ទី២៣ ខែធ្នូ បានរិះគន់សហរដ្ឋអាមេរិកចំពោះសម្ពាធយោធា និងសេដ្ឋកិច្ចរបស់ខ្លួនលើប្រទេសវ៉េណេស៊ុយអេឡា ដោយនិយាយទៅកាន់ក្រុមប្រឹក្សាសន្តិសុខអង្គការសហប្រជាជាតិថា វាជា «ឥរិយាបថគ្មានច្បាប់ទម្លាប់» និងជា «ការគំរាមកំហែង»។ ប្រទេសវ៉េណេស៊ុយអេឡា ដែលបានស្នើសុំកិច្ចប្រជុំក្រុមប្រឹក្សាបន្ទាន់ដោយមានការគាំទ្រពីទីក្រុងមូស្គូ និងទីក្រុងប៉េកាំង បានចោទប្រកាន់ទីក្រុងវ៉ាស៊ីនតោនពីបទ «គំរាមកំហែងខ្លាំងបំផុតដែលគេពុំធ្លាប់ដឹងនៅក្នុងប្រវត្តិសាស្ត្ររបស់យើង»។

សហរដ្ឋអាមេរិក បានដាក់ពង្រាយកងកម្លាំងយោធានៅក្នុងតំបន់សមុទ្រការ៉ាអ៊ីប ហើយថ្មីៗនេះបានស្ទាក់ចាប់នាវាដឹកប្រេងជាផ្នែកមួយនៃការបិទផ្លូវរបស់កងទ័ពជើងទឹកប្រឆាំងនឹងនាវារបស់វ៉េណេស៊ុយអេឡាដែលខ្លួនចាត់ទុកថាស្ថិតនៅក្រោមទណ្ឌកម្ម។ នៅក្នុងកិច្ចប្រជុំកាលពីថ្ងៃអង្គារ ឯកអគ្គរដ្ឋទូតសហរដ្ឋអាមេរិក លោក Mike Waltz បានឆ្លើយតបទៅនឹងការរិះគន់ដោយនិយាយថា «សហរដ្ឋអាមេរិក នឹងធ្វើអ្វីៗ ក្នុងអំណាចរបស់ខ្លួនដើម្បីការពារអឌ្ឍគោលរបស់យើង ព្រំដែនរបស់យើង និងប្រជាជនអាមេរិក»។

ប្រធានាធិបតីសហរដ្ឋអាមេរិកលោក Donald Trump ចោទប្រកាន់ប្រទេសវ៉េណេស៊ុយអេឡាថាបានប្រើប្រាស់ប្រេង ដែលជាធនធានដ៏សំខាន់របស់ប្រទេសអាមេរិកខាងត្បូងមួយនេះ ដើម្បីផ្តល់ហិរញ្ញប្បទានដល់ «សកម្មភាពភេរវកម្មគ្រឿងញៀន ការជួញដូរមនុស្ស ឃាតកម្ម និងការចាប់ជំរិត»។

ទីក្រុងការ៉ាកាស បានបដិសេធការជាប់ពាក់ព័ន្ធណាមួយនៅក្នុងការជួញដូរគ្រឿងញៀន ហើយអះអាងថា ទីក្រុងវ៉ាស៊ីនតោនកំពុងស្វែងរកការផ្តួលរំលំប្រធានាធិបតីរបស់ខ្លួន លោក នីកូឡាស ម៉ាឌូរ៉ូ ដើម្បីដណ្តើមយកប្រេងបម្រុងរបស់ប្រទេសវ៉េណេស៊ុយអេឡា។