អត្ថបទវិភាគពីសារព័ត៌មាន The Canary មានមូលដ្ឋាននៅចក្រភពអង់គ្លេស បាននិយាយកាលពីថ្ងៃអង្គារ (២៣ ធ្នូ) ថា អ៊ីស្រាអែលកំពុងគំរាមបើកសមរភូមិយោធាថ្មីនៅតំបន់មជ្ឈិមបូព៌ា ជាពិសេសប្រឆាំងនឹងអ៊ីរ៉ង់ និងលីបង់ ស្របពេលមានកំណើនវោហាសាស្រ្តផ្នែកនយោបាយ និងប្រព័ន្ធផ្សព្វផ្សាយ ដែលដឹកនាំដោយរដ្ឋាភិបាលរបស់លោកនាយករដ្ឋមន្រ្តី Benjamin Netanyahu។

យ៉ាងណាក៏ដោយ ការប៉ាន់ស្មានពីប្រភពអ៊ីស្រាអែល បានបង្ហាញថា សកម្មភាពយោធាដ៏សំខាន់ណាមួយនឹងត្រូវពន្យារពេលសិន ចាំរហូតដល់ក្រោយកិច្ចប្រជុំនាពេលខាងមុខរបស់លោក Netanyahu ជាមួយប្រធានាធិបតីអាមេរិក លោក Donald Trump នៅរដ្ឋ Florida នៅចុងខែធ្នូនេះ។

ប្រព័ន្ធផ្សព្វផ្សាយភាសាហេព្រើរ ត្រូវបានគ្របដណ្ដប់ដោយរបាយការណ៍ និងការវិភាគ ដែលពិភាក្សាពីលទ្ធភាពនៃការត្រៀមវាយប្រហារលើអ៊ីរ៉ង់ ក៏ដូចជាលទ្ធភាពនៃការពង្រីកប្រតិបត្តិការយោធានៅលីបង់។ ជាមួយគ្នានេះ សម្ពាធនយោបាយក៏កំពុងកើនឡើងនៅក្នុងរដ្ឋាភិបាលអ៊ីស្រាអែល ឱ្យបន្តសង្គ្រាមឡើងវិញនៅតំបន់ហ្កាហ្សា។

អ្នកវិភាគយោធាអ៊ីស្រាអែល បានពណ៌នាដំណាក់កាលបច្ចុប្បន្នថា ជាការបង្ហាញសញ្ញាច្បាស់លាស់នៃកំណើនភាពតានតឹងក្នុងតំបន់។ យោងតាមការប៉ាន់ស្មានពីប្រភពអ៊ីស្រាអែល លោក Trump កំពុងផ្តោតលើការបញ្ចប់បញ្ហាហ្កាហ្សា និងទប់ស្កាត់ការដួលរលំនៃបទឈប់បាញ់មានស្រាប់ ដោយបដិសេធមិនព្រមឱ្យអ៊ីស្រាអែល រំខានដល់ដំណើរការនេះទេ។ អ៊ីស្រាអែលវិញ កំពុងសម្លឹងរកការគាំទ្រពីសហរដ្ឋអាមេរិក ឬការបើកភ្លើងខៀវសម្រាប់សកម្មភាពយោធាណាមួយប្រឆាំងនឹងអ៊ីរ៉ង់៕