អាជ្ញាធរក្នុងតំបន់បាននិយាយនៅថ្ងៃពុធ (២៤ ធ្នូ) នេះថា ការវាយប្រហារដោយយានដ្រូនរបស់អ៊ុយក្រែន ពេញមួយយប់ បានកំណត់គោលដៅលើទីក្រុងមូស្គូ និងបានបង្កឱ្យមានអគ្គិភ័យនៅឧស្សាហកម្មមួយក្នុងតំបន់ Tula ភាគខាងត្បូងនៃរដ្ឋធានីរុស្ស៊ី។

អភិបាលក្រុងមូស្គូ លោក Sergei Sobyanin បាននិយាយលើកម្មវិធីផ្ញើសារតេលេក្រាមថា យានដ្រូនយ៉ាងតិច ៣គ្រឿង ដែលកំណត់គោលដៅលើទីក្រុងមូស្គូ ត្រូវបានបាញ់ទម្លាក់។ លោកបន្តថា សេវាសង្គ្រោះបន្ទាន់ត្រូវបានបញ្ជូនទៅកាន់កន្លែងដែលកម្ទេចកម្ទីដ្រូនបានធ្លាក់ ប៉ុន្តែមិនបញ្ចាក់ពីទំហំនៃការខូចខាតភ្លាមៗនោះទេ។

ក្រសួងការពារជាតិរុស្ស៊ីនិយាយថា អង្គភាពការពារដែនអាកាសរបស់ខ្លួនបានបំផ្លាញយានដ្រូនអ៊ុយក្រែន ១៧២គ្រឿង ក្នុងពេលមួយយប់ ដែលស្ទើរតែពាក់កណ្តាលនៃដ្រូនទាំងនោះ ស្ថិតលើតំបន់ជាប់ព្រំដែនអ៊ុយក្រែន។ អភិបាលក្រុង Tula លោក Dmitry Milyaev បាននិយាយថា កម្ទេចកម្ទីពីដ្រូនអ៊ុយក្រែនងដែលត្រូវបាញ់ទម្លាក់ បានបង្កអគ្គិភ័យនៅទីតាំងឧស្សាហកម្មមួយក្នុងតំបន់ Tula របស់រុស្ស៊ី។

អ៊ុយក្រែនបានបង្កើនការវាយប្រហារផ្លូវអាកាស ចូលជ្រៅទៅក្នុងទឹកដីរុស្ស៊ី ដោយនិយាយថា ខ្លួនកំពុងកំណត់គោលដៅទីតាំងយោធា ថាមពល និងភស្តុភារកម្ម ដើម្បីរំខានដល់កិច្ចប្រឹងប្រែងសង្គ្រាមរបស់ទីក្រុងមូស្គូ និងដើម្បីឆ្លើយតបទៅនឹងការវាយប្រហារជាបន្តបន្ទាប់របស់រុស្ស៊ី លើអ៊ុយក្រែន៕