កូរ៉េខាងជើង នៅថ្ងៃពុធ (២៤ ធ្នូ) នេះ បានគូសបញ្ជាក់ពីភាពស្របច្បាប់នៃការអភិវឌ្ឍផ្នែកអវកាសរបស់ខ្លួន នៅក្រោមច្បាប់អន្តរជាតិ ដែលជំរុញឱ្យមានការរំពឹងទុកពីអ្នកជំនាញថា ទីក្រុងព្យុងយ៉ាងអាចបន្តកម្មវិធីផ្កាយរណបឈ្លបយកការណ៍យោធាដែលត្រូវបានផ្អាករបស់ខ្លួនឡើងវិញ លឿនបំផុតនៅដើមឆ្នាំក្រោយនេះ។

គួររម្លឹកថា ទីក្រុងព្យុងយ៉ាង បានបាញ់បង្ហោះផ្កាយរណបចារកម្មយោធាដំបូងរបស់ខ្លួនគឺ Malligyong-1 ដោយជោគជ័យនៅឆ្នាំ២០២៣។ ក្រោយមក នៅឆ្នាំ២០២៤ មេដឹកនាំកូរ៉េខាងជើង លោក គីម ជុងអ៊ុន បានប្ដេជ្ញាថា នឹងបង្ហោះផ្កាយរណបឈ្លបយកការណ៍ ៣គ្រឿង បន្ថែមទៀត ប៉ុន្តែមិនទាន់មានការធ្វើតេស្តបន្ថែមនៅឡើយទេ។

ក្នុងអត្ថបទមួយចេញដោយកាសែតផ្លូវការ Rodong Sinmun កូរ៉េខាងជើងបានចង្អុលបង្ហាញពីការប្រកួតប្រជែងកាន់តែខ្លាំងឡើងជាសកលក្នុងការអភិវឌ្ឍវិស័យអវកាស ដោយលើកពីគម្រោងដែលដឹកនាំដោយប្រទេសមហាអំណាច ដូចជាចិន និងរុស្ស៊ីជាដើម។ ក្រុមអ្នកសង្កេតការណ៍និយាយថា ការចេញផ្សាយសេចក្ដីលម្អិតខុសធម្មតាបែបនេះអំពីគម្រោងអវកាសដឹកនាំដោយចិន និងរុស្ស៊ី គូសបញ្ជាក់ពីចំណាប់អារម្មណ៍របស់កូរ៉េខាងជើង ក្នុងការជំរុញសមត្ថភាពទាក់ទងនឹងអវកាស។

សេចក្ដីរាយការណ៍បានឱ្យដឹងថា រុស្ស៊ីអាចនឹងផ្តល់ឱ្យកូរ៉េខាងជើង នូវផ្កាយរណបឈ្លបយកការណ៍ ឬបច្ចេកវិទ្យាទាក់ទងនឹងការបាញ់បង្ហោះ ដើម្បីជាថ្នូរនឹងការគាំទ្រយោធាពីទីក្រុងព្យុងយ៉ាង។ អ្នកវិភាគនិយាយថា ប្រសិនបើជំនួយបែបនេះកើតឡើងមែន នោះកូរ៉េខាងជើង អាចប្រកាសផែនការដើម្បីបន្តការបាញ់បង្ហោះផ្កាយរណបនៅក្នុងសមាជបក្សលើកទី៩ របស់ខ្លួន ដែលត្រូវបានរំពឹងថា នឹងធ្វើឡើងនៅដើមឆ្នាំ២០២៦ ដ៏ខ្លីខាងមុខនេះ៕