អ៊ីស្រាអែល បានប្តេជ្ញារក្សាវត្តមានយោធាជាអចិន្ត្រៃយ៍នៅក្នុងតំបន់ហ្កាហ្សា និងពង្រីកទីតាំងលំនៅឋាននៅក្នុងតំបន់កាន់កាប់ West Bank ជាចំណាត់ការមួយដែលបានបង្កឱ្យមានការរិះគន់ពីមន្ត្រីអាមេរិក និងអាជ្ញាធរប៉ាឡេស្ទីន។

ថ្លែងនៅក្នុងពិធីសាធារណៈមួយកាលពីថ្ងៃអង្គារ នៅក្នុងតំបន់ទីតាំងលំនៅឋាន Beit El នៃតំបន់ West Bank រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បាននិយាយថា អ៊ីស្រាអែល នឹងមិនដកកងទ័ពចេញពីតំបន់ហ្កាហ្សាទាំងស្រុងនោះទេ ហើយបានប្តេជ្ញាបង្កើតទីតាំងលំនៅឋានថ្មីៗនៅក្នុងតំបន់ហ៊ុមព័ទ្ធនោះ។

លោក Katz និយាយថា «យើងស្ថិតនៅខាងក្នុងជ្រៅក្នុងតំបន់ហ្កាហ្សា ហើយនឹងមិនចាកចេញពីតំបន់ហ្កាហ្សាទាំងមូលឡើយ។ ការនិយាយលើកឡើងរបស់លោក Katz បានធ្វើឲ្យមានការរិះគន់ពីមន្ត្រីអាមេរិកម្នាក់ ដែលបាននិយាយនៅថ្ងៃដដែលនោះថា សេចក្តីថ្លែងការណ៍របស់លោក Katz បានធ្វើឱ្យប៉ះពាល់ដល់កិច្ចខិតខំប្រឹងប្រែងក្នុងការជំរុញសន្តិភាពនៅក្នុងតំបន់ហ្កាហ្សា ហើយនឹងធ្វើឱ្យចុះខ្សោយឆន្ទៈរបស់ប្រទេសអារ៉ាប់ ក្នុងការសហការជាមួយប្រទេសអ៊ីស្រាអែល។ ប៉ុន្មានម៉ោងបន្ទាប់ពីលោក Katz បាននិយាយដូច្នេះ ការិយាល័យរបស់លោកបានចេញសេចក្តីថ្លែងការណ៍មួយដើម្បីច្រានចោលបំណងណាមួយក្នុងការតាំងលំនៅឋាននៅតំបន់ហ្កាហ្សា។ សេចក្តីថ្លែងការណ៍នេះបាននិយាយថា លោក Katz បានធ្វើការកត់សម្គាល់ទាំងនេះនៅក្នុងបរិបទនៃការពិភាក្សាអំពីកិច្ចការសន្តិសុខ ហើយមិនពាក់ព័ន្ធនឹងគោលនយោបាយតាំងលំនៅឋានរបស់រដ្ឋាភិបាលទេ។ មន្ត្រីម្នាក់បាននិយាយថា គណៈរដ្ឋមន្ត្រីសន្តិសុខអ៊ីស្រាអែលបានអនុម័តការបង្កើតការតាំងលំនៅឋានថ្មីចំនួន១៩កន្លែង នៅក្នុងតំបន់កាន់កាប់ West Bank ដោយនាំឱ្យចំនួននៃការតាំងលំនៅឋានដែលត្រូវបានធ្វើឱ្យស្របច្បាប់ឬត្រូវបានអនុម័តក្នុងរយៈពេលបីឆ្នាំកន្លងទៅនេះកើនឡើងដល់៦៩កន្លែង។