រដ្ឋសភាវេណេស៊ុយអេឡាកាលពីថ្ងៃអង្គារ បានអនុម័តច្បាប់មួយដែលមានគោលបំណងធានា និងការពារសេរីភាពនៃការធ្វើនាវាចរណ៍ និងពាណិជ្ជកម្មប្រឆាំងនឹងចោរសមុទ្រ ការបិទផ្លូវ និងសកម្មភាពអន្តរជាតិខុសច្បាប់ផ្សេងទៀត បន្ទាប់ពីការរឹបអូសនាវាដែលដឹកប្រេងរបស់ប្រទេសនេះ ដោយសហរដ្ឋអាមេរិកនៅក្នុងតំបន់ការ៉ាអ៊ីប។

«ច្បាប់ដើម្បីធានាសេរីភាពនៃការធ្វើនាវាចរណ៍ និងពាណិជ្ជកម្មប្រឆាំងនឹងចោរសមុទ្រ ការបិទផ្លូវ និងសកម្មភាពអន្តរជាតិខុសច្បាប់ផ្សេងទៀត» ត្រូវបានប្រកាសថា ត្រូវបានអនុម័តដោយប្រធានរដ្ឋសភាលោក Jorge Rodriguez បន្ទាប់ពីការបោះឆ្នោត។

ច្បាប់នេះ ត្រូវបានអនុម័តក្នុងអំឡុងពេលសម័យប្រជុំវិសាមញ្ញ និងក្រោមនីតិវិធីបន្ទាន់ បន្ទាប់ពីការរឹបអូសនាវាដែលដឹកប្រេងរបស់វ៉េណេស៊ុយអេឡាដោយសហរដ្ឋអាមេរិកនៅលើសមុទ្រ ហើយវាអនុញ្ញាតឲ្យមានការជាប់ពន្ធនាគាររហូតដល់ ២០ ឆ្នាំ សម្រាប់អ្នកណាដែលផ្សព្វផ្សាយ ឬផ្តល់ហិរញ្ញប្បទានដល់អ្វីដែលច្បាប់នេះ ចាត់ទុកថា ជាចោរសមុទ្រ ឬការបិទផ្លូវ។

ច្បាប់នេះ មានគោលបំណងការពារទំនាក់ទំនងពាណិជ្ជកម្ម និងនយោបាយរបស់វ៉េណេស៊ុយអេឡាពីអ្វីដែលអាជ្ញាធរពិពណ៌នាថា ជាការគំរាមកំហែងដោយសហរដ្ឋអាមេរិក។

កាលពីថ្ងៃចន្ទ រដ្ឋសភាបានអនុម័តច្បាប់នេះ នៅក្នុងការអានលើកដំបូង បន្ទាប់ពីវាត្រូវបានស្នើឡើងដោយប្រធានាធិបតីវ៉េណេស៊ុយអេឡាលោក នីកូឡាស ម៉ាឌូរ៉ូ (Nicolas Maduro) ជាផ្នែកមួយនៃកិច្ចខិតខំប្រឹងប្រែង ដើម្បីការពារអធិបតេយ្យភាពជាតិ៕