នាយសេនាធិការអ៊ុយក្រែននិយាយថា កងកម្លាំងរុស្ស៊ីបានប្រើប្រាស់យានដ្រូនប្រភេទផ្សេងៗគ្នាចំនួន១១៦គ្រឿង ភាគច្រើនផលិតនៅអ៊ីរ៉ង់ ដើម្បីបើកការវាយប្រហារនៅពេលយប់ពីក្រុង Millerovo, Kursk, Orel និងតំបន់ផ្សេងទៀតចូលទៅក្នុងទឹកដីរបស់អ៊ុយក្រែន។

កងទ័ពអ៊ុយក្រែន និយាយថា «សត្រូវបានបង្ហោះយានដ្រូនបើកការវាយប្រហារទៅកាន់គោលដៅហេដ្ឋារចនាសម្ព័ន្ធដ៏សំខាន់មួយនៅក្នុងតំបន់ Chernihiv» ហើយ ប្រព័ន្ធការពារដែនអាកាសរបស់ខ្លួនបានវាយរុញច្រានការវាយលុកនេះ។ ទាហានអ៊ុយក្រែននិយាយថា យ៉ាងហោចណាស់យានដ្រូនចំនួន៦០គ្រឿងត្រូវបានបាញ់ទម្លាក់រហូតមកដល់ពេលនេះប៉ុន្តែយានដ្រូនចំនួន៤៨គ្រឿង បានវាយប្រហារលើគោលដៅនៅទូទាំងទីតាំងចំនួន១៩កន្លែង។

ទន្ទឹមនឹងនេះ រុស្ស៊ី បាននិយាយកាលពីថ្ងៃអង្គារថា កងកម្លាំងប្រដាប់អាវុធរបស់ខ្លួនបានវាយប្រហារទីតាំងឧស្សាហកម្មយោធាអ៊ុយក្រែន និងរោងចក្រថាមពល ខណៈអ៊ុយក្រែនក៏បានរាយការណ៍ពីការដកកងទ័ពរបស់ខ្លួនចេញពីទីក្រុង Siversk ភាគខាងកើតដែលបានប្រយុទ្ធគ្នា។