យោងតាមឯកសារការទូតដែលបានលេចឡើងជាសាធារណៈ នៅថ្ងៃពុធ (ទី២៤ ខែធ្នូ) នេះ បានបង្ហាញថា ប្រទេសចិន បានព្រមានជប៉ុនយ៉ាងខ្លាំងកុំឲ្យមានដំណើរទស្សនកិច្ចទៅកាន់កោះតៃវ៉ាន់ដោយឥស្សរជនសំខាន់ៗរបស់រដ្ឋាភិបាល ក្នុងអំឡុងពេលកិច្ចប្រជុំ រវាងរដ្ឋមន្ត្រីការបរទេសរបស់ភាគី ក្នុងឆ្នាំ១៩៩៤ ដោយគូសបញ្ជាក់អំពីថា តើបញ្ហាតៃវ៉ាន់ គឺជាប្រភពដែលអាចនាំឲ្យមានភាពរកាំរកូស ក្នុងទំនាក់ទំនងចិន-ជប៉ុនយ៉ាងដូចម្ដេច។

ឯកសារនោះ បានបង្ហាញថា លោក Tsutomu Hata ដែលពេលនោះជាឧបនាយករដ្ឋមន្ត្រី និងរដ្ឋមន្ត្រីការបរទេស កំពុងបំពេញទស្សនកិច្ចនៅប្រទេសចិន ជាពេលដែលរដ្ឋមន្ត្រីការបរទេសចិននាពេលនោះ គឺលោក Qian Qichen បានប្រាប់រូបលោកកាលពីថ្ងៃទី៨ ខែមករា ឆ្នាំ១៩៩៤ ថា ការធ្វើដំណើររបស់មន្ត្រីរដ្ឋាភិបាលផ្លូវការទៅកាន់កោះតៃវ៉ាន់ គឺ «មិនអាចទទួលយកបាន» ឡើយ ទោះបីជាទីក្រុងប៉េកាំង នឹងមិន «មានបញ្ហាជាមួយទំនាក់ទំនងសេដ្ឋកិច្ច ក្នុងវិស័យឯកជន» រវាងប្រទេសជប៉ុន និងកោះស្វ័យគ្រប់គ្រងនេះក៏ដោយ។

ការព្រមានរបស់ចិន គឺទំនងជាសំដៅលើសេចក្ដីរាយការណ៍ពីការគ្រោងទុកបំពេញទស្សនកិច្ច នៅកោះតៃវ៉ាន់ ដោយរដ្ឋមន្ត្រីឧស្សាហកម្មជប៉ុននាពេលនោះ គឺលោក Hiroshi Kumagai ជាអ្វីដែលបានកើតឡើងបន្ទាប់ពីមានការធ្វើដំណើរទៅទីនោះ ដោយមន្ត្រីជាន់ខ្ពស់មកពីក្រសួងរបស់លោក ក្នុងខែធ្នូ ឆ្នាំ១៩៩៣។

បន្ទាប់ពីលោក Hata វិលត្រឡប់ពីប្រទេសចិនវិញ ប្រព័ន្ធផ្សព្វផ្សាយ បានរាយការណ៍ថា គម្រោងធ្វើទស្សនកចិ្ច នៅកោះតៃវ៉ាន់ ត្រូវបានលុបចោលហើយ។ ឯកសារបានបង្ហាញថា នៅពេលនោះ ក្រសួងការបរទេសជប៉ុន បានចាត់ទុកទំនាក់ទំនងជាមួយកោះតៃវ៉ាន់ថា ជា «បញ្ហាដ៏ធ្ងន់ធ្ងរដែលការដើរខុសតែបន្តិច អាចធ្វើរង្គោះរង្គើមូលដ្ឋាននៃទំនាក់ទំនងជប៉ុន-ចិន»។

យោងតាមឯកសារចងក្រងទុករបស់ក្រសួងការបរទេស បានបង្ហាញថា លោក Qian បានជំរុញឲ្យប្រទេសជប៉ុនគោរពតាមសេចក្តីថ្លែងការណ៍រួមទ្វេភាគីឆ្នាំ១៩៧២ ដែលទីក្រុងតូក្យូបានលើកឡើងថា ខ្លួន «យល់ និងគោរពយ៉ាងពេញលេញ» នូវជំហររបស់ចិន ដែលថា កោះតៃវ៉ាន់ គឺជា «ផ្នែកដែលមិនអាចកាត់ផ្តាច់បាន» នៃទឹកដីរបស់ខ្លួន៕